AzƏrbayCan Mərkəzi Bankı son günlər bəzi kütləvi informasiya vasitələrində ölkədə fəaliyyət göstərən bəzi bankların bağlanması, birləşməsi və ya müflisləşməsi ilə əlaqədar məlumatlarla bağlı bəyanat yayıb. Qurumun mətbuat xidmətindən "Həftə içi"nə verilən məlumata görə, bəyanatda bankların fəaliyyətini normal iş rejimində davam etdirdiyi, onların maliyyə vəziyyətinə və sağlamlığına hər hansı mənfi təsir göstərəcək risklərin mövcud olmadığı bildirilir. Bəyanatda həmçinin bankların bağlanması məsələsinin hazırda müzakirə edilmədiyi və bununla bağlı hər hansı qərarın mövcud olmadığı bildirilir: "Mərkəzi Bank tərəfindən həyata keçirilən tədbirlər nəticəsində ölkənin bank sistemi qlobal maliyyə böhranını hazırlıqlı qarşılayıb, bank sektorunun maliyyə sabitliyi qorunub-saxlanılıb. Bank sistemi qlobal maliyyə böhranı şəraitində də inkişaf templərini qoruyub, funksiyalarını səmərəli şəkildə icra etdirib".