Azərbaycanın gənclər və idman naziri Azad Rəhimov dünən İordaniya Haşimilər Krallığının Gənclərlə İş üzrə Ali Şurası Baş Katibliyinin rəsmi nümayəndə heyətini qəbul edib. Bu barədə çərşənbə günü "Trend"ə nazirliyin mətbuat xidmətindən bildirilib.
   
   
   
   "Görüş zamanı "Azərbaycan hökuməti və İordaniya hökuməti arasında 2010 - 12-ci illər üçün elm və təhsil, mədəniyyət və incəsənət, gənclər və idman, arxeologiya, səhiyyə və media sahələri üzrə icraedici əməkdaşlıq proqramı" çərçivəsində gənclər və idman sahəsində ayrı-ayrılıqda ikitərəfli sazişin imzalanması məsələsi də müzakirə edilib" - məlumatda deyilir. Nümayəndə heyətinin tərkibində İordaniya Haşimilər Krallığının Gənclərlə İş üzrə Ali Şurasının baş katibi Sari Hamdan, Milli Olimpiya Komitəsinin vitse-prezidenti, nümayəndə heyətinin rəhbəri, Əbdürrəhman Armuti, gənclər hərəkatının təşviqi üzrə milli fondun baş direktoru Arif İshakat, beynəlxalq təşkilatlar bölməsinin rəisi Narin Hay Tass olublar. Nazir Azərbaycan və İordaniya gənclərinin islam ölkələrinin gənclər forumu layihəsi çərçivəsində tez-tez görüşüb, sıx əlaqədə olduqlarını da bildirib. Sari Hamdan gənclər və idman sahəsində artıq real əməkdaşlığın önəmindən söz açaraq hər iki ölkənin gənclər təşkilatlarının rəhbərlərinin görüşərək gələcək layihələri birgə müzakirə etmələri, İordaniya idmançılarının Azərbaycanda təlim-məşq toplantılarına qatılmaları təkliflərini irəli sürüb ("Trend").