AzƏrbaycan prezidenti İlham Əliyev dünən Polşanın baş naziri Donald Tuskun başçılıq etdiyi nümayəndə heyətini qəbul edib. "AzərTAc"ın məlumatına görə, dövlətimizin başçısı Azərbaycanla Polşa arasında münasibətlərin uğurla inkişaf etdiyini vurğulayıb. Ölkələrimiz arasında siyasi əlaqələrin yüksək səviyyədə olduğunu bildirən prezident İlham Əliyev iqtisadi sahədə də əməkdaşlığın intensivləşdirilməsinin zəruriliyini qeyd edib. Azərbaycanın Polşa ilə əlaqələri müxtəlif sahələrdə genişləndirməkdə maraqlı olduğunu deyən dövlətimizin başçısı baş nazirin ölkəmizə səfərinin əməkdaşlıq üçün yeni sahələrin müəyyən edilməsi, birgə fəaliyyət üçün əlavə tədbirlərin müzakirəsi baxımından əhəmiyyətli olacağına əminliyini bildirib. Baş nazir D.Tusk ölkələrimizin tarixində bizi bir-birimizlə sıx birləşdirən məqamların olduğunu vurğulayıb.
   
   
   
   ***
   
   
   
   Prezident İlham Əliyev dünən "RWE" şirkətinin idarə heyətinin sədri Yurgen Qrossmanın başçılıq etdiyi nümayəndə heyətini qəbul edib. "AzərTAc"ın məlumatına görə, dövlətimizin başçısı Almaniyanın "RWE" şirkəti ilə Azərbaycan Dövlət Neft Şirkəti arasında qarşılıqlı anlaşma memorandumunun imzalanması münasibətilə qonağı təbrik edib. Energetika sahəsində Azərbaycanın 15 ildən artıq beynəlxalq əməkdaşlıq təcrübəsinə malik olduğunu bildirən prezident İ.Əliyev bu müddət ərzində bütün layihələrin uğurla icra olunduğunu qeyd edib. "RWE" şirkətinin idarə heyətinin sədri Y.Qrossman Azərbaycan Dövlət Neft Şirkəti ilə qarşılıqlı anlaşma memorandumunun imzalanmasını gələcək əməkdaşlığın yaxşı başlanğıcı kimi qiymətləndirib və əməkdaşlığımızın uğurla inkişaf edəcəyinə ümidvar olduğunu bildirib.