Hazırda paytaxt ərazisində çoxlu ev alğı-satqı mərkəzlərinə rast gəlinir. Əhaliyə xidmət edən bu obyektlərdən edilən narazılıqlar isə bitib-tükənmir. Daşınmaz əmlak satanlar və ya alanlar tez-tez aldandıqları, maklerlərin onlardan vəd etdiklərindən çox pul tələb etdikləri barədə şikayətlənirlər.
   
   
   
   Səbəb kimi isə bir çox hallarda həmin obyektlərdə çalışanların qeyri-professionallığı göstərilir. Bildirək ki, rieltor xidməti xarici ölkələrdə bu işin professionalları tərəfindən həyata keçirilir.
   
   Eşitdik ki, bu günlərdə ev alğı-satqı xidmətini tarazlamaq məqsədi ilə yeni qurum yaradılıb. Üzərinə belə bir məsuliyyəti götürən Bakı Rieltor Assosiasiyasının bu işə hansı yeniliklər gətirəcəyi ilə maraqlandıq. Qurumun icraçı direktoru Elnur Azadovun dediyinə görə, hazırda əhaliyə xidmət edən maklerlər köhnə qaydalarla işləyirlər ki, nəticədə qeyri-professional xidmət müştərilərin bir çox hallarda narazılığına səbəb olur: "Bizim məqsədimiz rieltor xidmətinin fəaliyyətini sivil vəziyyətə gətirmək və əhaliyə yeni üsullarla xidmət göstərməkdir. Məsələn: biz öz işimizə hüquqşünas cəlb etmişik ki, ev alğı-satqısı zamanı müştəri ilə daşınmaz əmlak sahibi arasında hüquqi müstəvidə problem yaranmasın. Onu da deyim ki, hələlik bu məsələ ilə bağlı standart forma ilə bağlı yekdil qərar qəbul olunmayıb. Hazırda bazarda bu sahədə olan problemlər öyrənilir ki, bütün bu amillər nəzərə alınaraq vahid forma tərtib edilsin".
   
   E.Azadov onu da bildirdi ki, bu sahədə çalışan professional makler xidməti ilə məşğul olanlar assosiasiya ətrafında bir araya gətiriləcək: "Hazırda assosiasiyanın 20 üzvü var. Bunlar bu sahədə çalışan professional rieltor şirkətləridir. Qalan maklerlərin iş fəaliyyəti, təcrübəsi, işçilərinin sayı və sair öyrənilir. Belə şirkətlər çox olduğundan hələlik onların professionallığı ilə bağlı dəqiq fikir söyləmək çətindir. Öz xidmətləri ilə qənaətbəxş hesab edilənlər də assosiasiyaya üzv qəbul ediləcəklər. Hələlik isə əhaliyə məsləhət görərdik ki, gələcəkdə hər hansı problemlə üz-üzə qalmamaq üçün bu işin professionallarına müraciət etsinlər. Bu zaman bütün müqavilələrin mütləq surətdə yazılı şəkildə aparılmasına diqqət yetirilməlidir. Həmin sənədlərin altında imza qoymazdan əvvəl isə sənədlərlə yaxından tanış olmağı unutmasınlar. Mülkü satışa çıxarmazdan öncə onu kimə etibar etməyi düşünmək lazımdır. Hər bir rieltor isə alğı-satqı zamanı məsuliyyətini başa düşməlidir".
   
   İcraçı direktor hazırda "Rieltor fəaliyyəti" ilə bağlı qanunvericiliyin də hazırlandığını dedi: "Yaxın vaxtlarda həmin sənəd baxılmaq üçün Milli Məclisə təqdim olunacaq.
   
   Həmçinin rieltorlar assosiasiyası maklerlərin təkmilləşdirilməsi ilə bağlı xüsusi kurslar təşkil edəcək. Kurslarda 3 kateqoriyadan olan maklerlər iştirak edə bilərlər: şirkətlərin rəhbərləri, iş təcrübəsi olan agentlər və təcrübəsi olmayan işçilər. Həmin şəxslərə kursu bitirməklə bağlı sənədlər veriləcək. Bununla belə, rieltor şirkətlərinə sertifikatların verilməsi planlaşdırılır".
   
   

Sahibkarlığa Kömək Milli Fondunun təşkilatçılığı ilə dünən Biləsuvarda "Regionlarda sahibkarlığın inkişafına dövlət dəstəyi" mövzusunda seminar keçirilib. Tədbirdə aran iqtisadi rayonunda fəaliyyət göstərən 250-yə yaxın sahibkar iştirak edib. Seminar iştirakçıları əvvəlcə Biləsuvarda fondun güzəştli krediti hesabına "Azərsun-holdinq" MMC tərəfindən inşa edilən konserv zavodunun fəaliyyəti ilə tanış olublar. İqtisadi İnkişaf Nazirliyindən "Həftə içi"nə daxil olan məlumata istinadən, tədbirdə nazirliyin nümayəndələri ilə yanaşı, Biləsuvar rayon İcra Hakimiyyətinin başçısı Adil Məmmədov da sahibkarlar qarşısında çıxış edib. Nazirliyin Bakı Biznes-Tədris Mərkəzinin direktor müavini Rahim Mürsəlov sahibkarların maarifləndirilməsi sahəsində görülən işlər və keçirilməsi nəzərdə tutulan tədbirlərdən, Sahibkarlığa Kömək Milli Fondunun icraçı direktoru Şirzad Abdullayev 2010-cu ildə güzəştli kreditlərin yönəldiləcəyi prioritet sahələr barədə danışıb. Tədbir çərçivəsində həmçinin müvəkkil kredit təşkilatları vasitəsilə Biləsuvar və ətraf rayonlarda fəaliyyət göstərən 47 sahibkarlıq subyektinə güzəştli kreditlər verilib. Bu kreditlər hesabına 100-dən çox yeni iş yerinin açılması nəzərdə tutulur.
   
   

Azərbaycanda quraşdırılan bankomatların sayı 1708 ədədə çatdırılır. Mərkəzi Bankdan verilən məlumata görə, bu, ötən ilin müvafiq dövrü ilə müqayisədə 163 ədəd çoxdur: "Bankomatların 972-si Bakıda, 736-sı isə digər şəhər və rayonlarda yerləşir. Hesabat dövrü ərzində ölkə üzrə pos-terminalların sayı isə 8657 ədədə çatdırılıb. Bu göstərici isə ötən ilin müvafiq dövrü ilə müqayisədə 543 ədəd çoxdur. Pos-terminalların 7873-ü Bakı şəhərində, 784-ü isə digər regionlarda yerləşir".
   
   Bankdan verilən digər məlumatda isə bildirildi ki, Azərbaycan iqtisadiyyatına qoyulan kreditlərin də həcmi artıb: "Belə ki, kredit qoyuluşları 8431,2 mln. manat təşkil edib. Bu isə ötən ilin müvafiq dövrü ilə müqayisədə 17,1 faiz çoxdur. Qeyd edək ki, kredit qoyuluşlarının 331,4 mln. manatı vaxtı keçmiş kreditlərin payına düşüb. Kreditlərin 2349,6 mln. manatı qısamüddətli, 6081,7 mln. manatı isə uzunmüddətli kreditlər olub. Dövlət bankı tərəfindən iqtisadiyyata 3922,8 mln. manat, özəl banklar tərəfindən 4325,2 mln. manat, qeyri-bank kredit təşkilatları tərəfindən isə 183,2 mln. manat kredit qoyulub".
   
   

DövlƏt Sosial Müdafiə Fondu, Vergilər Nazirliyi və Dövlət Əmək Müfəttişliyi birgə şəkildə özəl müəssisələrdə ikili mühasibat və əməkhaqlarının leqallaşdırılması üzrə araşdırmalara başlayıb. Sosial Müdafiə Fondundan "Həftə içi"nə verilən məlumata istinadən, artıq bu araşdırmaların ilkin nəticələri də bəllidir: "Araşdırmalar zamanı özəl sektorda əməkhaqlarının leqallaşdırılması sahəsində çoxlu nöqsan aşkarlanıb. Belə ki, indiyə qədər araşdırmaların aparıldığı tibb müəssisələri, nəqliyyat, iri ticarət obyektləri, şadlıq sarayları, restoran və ictimai-iaşə obyektlərində işçilərə əməkhaqqının ikili mühasibat əsasında verildiyi məlum olub. həmin müəssisələrin hər birinə nöqsanların aradan qaldırılması üçün xəbərdarlıq edilib. Hazırda bu cür yoxlamalar özəl sektorda fəaliyyət göstərən digər müəssisələrdə davam edir. Əməkhaqlarının leqallaşdırılması məqsədi ilə belə monitorinqlər tikinti şirkətlərində, xırda sahibkarlıq subyektlərində də aparılacaq".
   
   

Azərbaycan İnternet Forumunun rəhbəri Osman Gündüz son günlər bir sıra internet resurslarına, xüsusilə də "Azadlıq" radiosunun www.azadliq.org və www.azadliqradiosu.az internet resursuna, www.yahoo.com və www.facebook.com resurslarına ölkə ərazisindən girişlə bağlı ciddi məhdudiyyətlər yarandığını bildirərək, problemin süni şəkildə yarandığını qeyd etdi. O.Gündüzün "Həftə içi"nə verdiyi məlumata görə, bu günlər ərzində bir sıra provayderlərin istifadəçiləri adıçəkilən resurslardan ümumiyyətlə istifadə edə bilmirlər və bəzi resurslara girişlə bağlı problemlər hələ də qalmaqdadır: "Baş verənlərin araşdırılması məqsədi ilə AİF-in mütəxəssisləri və bir sıra ekspertlər tərəfindən məhdudiyyətlərin mahiyyəti araşdırıldı və problemləri törədən səbəblərin müəyyən edilməsi istiqamətində işlər aparıldı. Araşdırmalar nəticəsində müəyyən olunub ki, bir sıra provayderlər vasitəsilə adıçəkilən resursa girişlə bağlı ciddi əngəllər var. Provayderlərin bir çoxu isə ölkə daxilindən bu resurslara girişlə bağlı şəbəkədə müəyyən problemlərin olduğunu, lakin onlar tərəfindən hansısa süni əngəllərin yaradılmadığını bildiriblər. Adıçəkilən resursa digər ölkələrin ərazisindən giriş isə sərbəstdir. Məsələyə münasibət bildirən ölkənin əsas internet təchizatçısı olan "Delta Telekom" şirkətinin mütəxəssisləri adıçəkilən informasiya resursuna girişin məhdudlaşdırılmasının texniki problemlərlə bağlı ola biləcəyini vurğulayıblar. Bununla belə, problemin mahiyyətini tam dəqiqliyi ilə müəyyən etmək, saytlara girişi əngəlləyən səbəbləri konkret müəyyən edib aradan qaldırmaq mümkün olmayıb. Qeyd edim ki, kifayət qədər istifadəçi auditoriyası olan bir informasiya resursu ilə bağlı ölkədə yaranmış bu vəziyyət cəmiyyətdə birmənalı qarşılanmayıb. Ona görə də AİF bildirir ki, istənilən halda, vətəndaşların informasiya hüququnun əngəllənməsi, normal informasiya mübadiləsinin pozulması yolverilməzdir".
   
   

VergilƏr Nazirliyi cari ilin fevral ayı ərzində keçirilmiş operativ nəzarət tədbirləri zamanı 1120 vergi ödəyicisində qanunvericiliyin pozulması faktlarını aşkar edib. Nazirliyin ictimaiyyətlə əlaqələr şöbəsindən "Həftə içi"nə daxil olan məlumata görə, 521 vergi ödəyicisində nağd hesablaşmaların aparılması qaydalarının pozulması, 174 vergi ödəyicisində valyuta sərvətlərinin ödəniş vasitəsi kimi qəbul edilməsi və valyuta sərvətlərinin ticarət, iaşə və xidmət müəssisələrində qanunvericiliklə müəyyənləşdirilmiş qaydalar pozulmaqla alınıb-satılması və ya dəyişdirilməsi faktları üzə çıxarılıb. Keçirilən tədbirlər zamanı vergi orqanlarında uçota durmadan fəaliyyət göstərən 110 vergi ödəyicisi aşkarlanıb, 284 vergi ödəyicisinin xüsusi razılıq (lisenziya) tələb edilən fəaliyyət növləri ilə belə razılıqsız (lisenziya) məşgul olması faktları müəyyənləşdirilib. Vergi orqanlarının həyata keçirdiyi operativ nəzarət tədbirləri zamanı 41 vergi ödəyicisində 44 nəfər fiziki şəxsin əmək müqaviləsi bağlamadan işə cəlb edilməsi, 77 vergi ödəyicisinin fərqlənmə nişanı olmadan avtomobil nəqliyyatı ilə sərnişin daşıması faktları aşkarlanıb. Aksiz markalarının tətbiqi vəziyyətinə nəzarət məqsədi ilə keçirilən tədbirlər zamanı isə 19 vergi ödəyicisində aksiz markası ilə müvafiq qaydada markalanmamış 356,52 manat dəyərində 404 ədəd mal aşkarlanıb.