Xalq artisti Aygün Kazımova fanatlarından küsüb. "ANS-press"in məlumatına görə, müğənni "Şamplena fanatlar" fanat ordusuna yaman qəzəblənib. Buna isə qrupa daxil olan şəxslərin Aygünün mobil nömrəsini icazəsiz olaraq fanatlar arasında yayması səbəb olub. Bu xəbəri isə Aygün Kazımovaya artıq 4 ildir fəaliyyət göstərən "Aygün-fans" klubunun üzvləri çatdırıb. Qeyd edək ki, müğənniyə fanatlıq edən 2 klub arasında rəqabət hökm sürür. Fanatlardan aldığımız məlumata görə, pərəstişkarlar arasında qeyri-sağlam rəqabətin yaranmasında sənətçinin rolu da az deyil. Belə ki, "Aygün-fans" klubunun üzvləri ilə isti münasibətdə olan Kazımova "Şamplena fanatlar"ın üzvlərinə ögey münasibət bəsləyir. Məsələ ilə bağlı Aygün Kazımovanın fikrini öyrənmək istədik. Telefona köməkçisi cavab verdi. Adını bilmədiyimiz qadının sözlərinə görə, Aygünün mobil nömrəsinin yayılması o qədər ciddi məsələ deyil. Onsuz da Aygün xanımın telefon nömrəsini böyük pərəstişkar kütləsindən gizlətmək mümkün deyil. Qaldı müğənninin fan-klublar arasında ayrı-seçkilik etməsinə, bu, düzgün deyil. Aygün xanım hər iki qrupu eyni dərəcədə sevir.