Pekin yenə də hesab edir ki, Tehrana qarşı sanksiyaların tətbiqi ilə bağlı müzakirələr bu ölkənin nüvə proqramı ətrafındakı gərginliyi aradan qaldırmayacaq. Bu ölkənin xarici işlər naziri Yan Szeçi "Röyters"ə açıqlamasında bildirib ki, hazırda sanksiyaların tətbiqindən danışmaq məsələnin diplomatik yollarla həlli imkanlarının qarşısına sədd çəkmək deməkdir. Qeyd edək ki, Çin XİN başçısı məlum açıqlamanı ABŞ dövlət katibinin müavini Filipp Kroulinin Vaşinqtonun İrana sanksiyaların tətbiqi ilə bağlı "altılıq" ölkələri ilə müzakirələr apardığını bildirməsindən sonra səsləndirib. Bu arada isə ABŞ İranın dustaqları dəyişmək haqda təklifini qəbul etməyib. "Qolos Rossii" xəbər verir ki, ABŞ-ın dövlət katibi Hillari Klinton İranın həbsdəki Amerika vətəndaşlarını birtərəfli qaydada azad etməli olduğunu bildirib. O, ölkələr arasında bu istiqamətdə heç bir müzakirənin aparılmadığını da söyəlyib.Xatırladaq ki, İran prezidenti Mahmud Əhmədineyad ABŞ-a qarşılıqlı olaraq dustaqların dəyişdirilməsini təklif etmişdi. O yalnız bu halda bir müddət əvvəl casusluqda günahlandırılaraq həsb edilmiş 3 ABŞ vətəndaşının azad oluna biləcəyini söyləmişdi. Bunun ardınca isə Tehranın kosmik raketləri havaya buraxması Vaşinqton tərəfindən təxribat kimi qiymətləndirilib. "İTAR-TASS" xəbər verir ki, bunu Ağ Evin mətbuat katibinin müavini Bill Berton deyib. "ABŞ İranda baş verənlərdən xəbərdardır. Bunu təxribat kimi qiymətləndiririk", - deyə Berton qeyd edib. "ABŞ prezidenti yenə də hesab edir ki, İranın düz yola qayıtması üçün hələ gec deyil. Tehran beynəlxalq ictimaiyyətlə danışıqlar masası arxasına əyləşməli, beynəlxalq öhdəliklərə əməl etməlidir", - deyə Berton bildirib.

Ukrayna prezidentliyinə namizəd, bu kürsünü tutmağa şansı daha çox sayılan Regionlar partiyasının sədri Viktor Yanukoviç GUAM-ın fəaliyyət perspektivləri ilə bağlı mövqeyini açıqlayıb. "Svoboda" radiosunun məlumatına görə, o bildirib ki, bu beynəlxalq təşkilatın fəaliyyətini aktual saymır: "Artıq GUAM aktuallığını itirib və praktik olaraq onun siyasi layihə kimi reallaşdırılması da mümkün deyil. Mən son 5 ildə GUAM-la bağlı söhbətlər eşitsəm də, onun konkret fəaliyyətini görməmişəm". V.Yanukoviç bildirib ki, seçkilərin ikinci turunda qələbə qazanacağı təqdirdə bu məsələni Azərbaycan prezidenti İlham Əliyevlə danışmağa hazırdır.
   
   

"FikrimcƏ, Ermənistanın Baltikyanı ölkələrlə münasibətləri davam etdiriləcək. Çünki İrəvan anlayır ki, onu qarşıda Azərbaycanla informasiya müharibəsi gözləyir" - bu fikirləri Yeni Novqorodda "Avroatlantik məkan: tendensiyalar, institutlar və maraqlar" mövzusunda keçirilən "dəyirmi masa"da Latviyadan olan millət vəkili Oskars Kastens səsləndirib. "Regnum"un yaydığı məlumata əsasən, o bildirib ki, Dağlıq Qarabağ münaqişəsi hələ də həll edilməmiş qalır. Əgər orada müharibə yenidən başlasa, Ermənistana Avropa Birliyinə çıxış lazım olacaq: "Müharibə ilə bağlı məlumatları Avropa Birliyinə müxtəlif yollarla çatdırmaq mümkündür. Bunlardan biri də Baltikyanı ölkələrdir".
   
   
   
   
   
   
   
   

Vaşinqton Əfqanıstana yükdaşımalarla bağlı Rusiyanı tənqid atəşinə tutub. "İnterfaks"ın məlumatına görə, ABŞ-ın Əfqanıstan və Pakistan üzrə xüsusi təmsilçisi Riçard Holbruk jurnalistlərə açıqlamasında deyib ki, iki ölkə arasında Əfqanıstana hava yolu ilə yükdaşımalara dair saziş mövcuddur. Lakin Rusiyadakı bürokratik əngəllər bu dəhlizin işləməsinə mane olur:
   
   "Bu məsələ ilə bağlı suallar Rusiya tərəfinə yönləndirilməlidir. Mən bürokratik əngəllərin bu uçuşları nə üçün dayandırdığını bilmirəm. Bu işlə məşğul olmuram". Qeyd edək ki, bir müddət əvvəl xarici işlər naziri Sergey Lavrov bildirmişdi ki, Əfqanıstana hava yolu ilə hərbi yüklərin daşınması Mərkəzi Asiyanın bəzi dövlətləri ilə texniki məsələlərin həll edilməməsi ilə bağlıdır. "Rusiya Əfqanıstana hərbi yüklərin daşınması ilə bağlı ABŞ-la əldə etdiyi razılaşmanı yerinə yetirməyə hazırdır", - deyə Lavrov vurğulayıb. Onun sözlərinə görə, bu məsələdə əsas maneçilik Qazaxıstanla bağlıdır. Lavrov deyib ki, Rusiya ərazisindən hərbi yüklərin daşındığı bir ABŞ təyyarəsinə uçmağa icazə verib. İkinci dəfə analoji müraciət daxil olsa da, sonradan bu müraciət geri çəkildi. Bunun ardınca isə Rusiyadakı ABŞ səfiri Con Beyerli iki ölkə arasında Əfqanıstana yüklərin daşınması ilə bağlı razılaşmanın işləməməsi barədə məlumatları təkzib edib. "Bu marşrutun işləməməsi ilə bağlı bir çox yoxlanılmamış məlumatlar yayılır. Bu vaxta qədər 5 ABŞ təyyarəsi bu marşrutdan istifadə edərək Əfqanıstana uçub. Növbədə isə hələ 11-i var. Hesab edirəm biz bu marşrutdan bu il hələ çox istifadə edəcəyik. Çünki prezident Obama Əfqanıstandakı qoşunların sayının artırılmasına qərar verib. Bu isə o deməkdir ki, Rusiya üzərindən hava dəhlizinin açıq olması hərbçilərimizin təminatı baxımından çox əhəmiyyətlidir". Qeyd edək ki, iki ölkə arasında bu cür razılaşma keçən ilin yayında Moskvada ikitərəfli zirvə toplantısında əldə olunub. Həmin razılaşmaya əsasən, Rusiya hər gün içində 4000 ton yük olan 12 ABŞ təyyarəsinin onun hava məkanından istifadə edərək Əfqanıstana uçmasına icazə verəcək.
   
   "Əfqanıstandakı vəziyyət böhranlı dərəcədə pisləşib" - bu fikirləri Kollektiv Təhlükəsizlik Şurasının sədri Nikolay Bordyuja səsləndirib. Onun sözlərinə görə, bu artıq ölkə rəsmilərinin də dilindən səsləndirilməkdədir. Əfqanıstandakı vəziyyətin günü-gündən pisləşməməsi üçün isə əlavə qüvvələrə ehtiyac duyulur: "İstənilən münaqişəni yalnız dialoq və siyasi yolla həll etmək mümkündür". Bordyuja Əfqanıstanla sərhəd olmasına baxmayaraq, rəhbərlik etdiyi quruma üzv dövlətlərin ərazisində hansısa müharibənin və hərbi toqquşmaların baş verməyəcəyini söyləyib: "KTŞ ilə NATO arasında rəsmi əlaqələr yoxdur. Bunun başlıca səbəbi isə NATO-nun mövqeyidir. Biz dəfələrlə təklif etmişik ki, Əfqanıstanda narkotik qaçaqmalçılığı və terrora qarşı mübarizə kimi aktual məsələlərin həllində birgə fəaliyyət göstərə bilərik. Ümid edirəm alyansın rəhbərliyi dəyişəndən sonra KTŞ ilə NATO arasındakı münasibətlərə baxış dəyişəcək".
   
   Bu arada isə Əfqanıstanda NATO qüvvələri itkilər verməkdə davam edir. Keçən sutka ərzində koalisiya qüvvələri 2 əsgərini itirib, 5-i isə yaralanıb. Gilmənd vilayətinin Sangin qəsəbəsində patrul xidməti çəkən iki ABŞ hərbçisi fuqasın partlaması nəticəsində həyatını itirib. Heratda isə mina partlaması nəticəsində içində italyan hərbçiləri olan zirehli maşın qəzaya uğrayıb. Nəticədə 5 italiyalı əsgər ağır yaralanıb. Gündüz vilayətində isə almaniyalı hərbçilərin maşını atəşə tutulsa da, heç kim xəsarət almayıb. Cavab atəşi nəticəsində 2 terrorçu öldürülüb. Bu arada isə Əfqanıstanın Müdafiə Nazirliyinin məlumatı yayılıb. Vurğulanır ki, yaxın vaxtlarda Gilmənddə "Taliban" döyüşçülərinə qarşı genişmiqyaslı hərbi əməliyyatlar başlayacaq. Bu əməliyyatlara koalisiya qüvvələrinin minlərlə hərbçisi, o cümlədən Əfqanıstan ordusu və polisi də qatılacaq. RİA "Novosti" isə hərbi mənbələrə istinadən xəbər verir ki, "Taliban" rəhbərliyi Gilmənddəki səhra komandirlərinə bu olayla bağlı gizli tapşırıqlar verib. Əmrə əsasən, talibançılar koalisiya qüvvələri ilə açıq döyüşdən qaçacaq, yalnız fuqasların partladılması ilə kifayətlənməyəcəklər. Onlara hücum ediləcəyi təqdirdə isə bir qədər geri çəkilməli, əməliyyatlar başa çatdıqdan sonra həmin ərazilərə qayıtmalıdırlar.
   
   

İSRAİLİN baş naziri Benyamin Netanyahu Suriya ilə heç bir şərt irəli sürülmədən danışıqlara başlamaq üçün dünyanın istənilən yerinə getməyə hazır olduğunu açıqlayıb. Baş nazir vurğulayıb ki, İsrail bu məsələdə tərəfsiz mövqe nümayiş etdirən üçüncü bir ölkənin vasitəçiliyini heç zaman rədd etməyib: "Təəssüflər ki, Suriya ortaya bir çox problemlər çıxardır. Bütün tərəflər üçün iqtisadi, sülh və sabitlik gətirəcək müzakirələri əngəlləyir". Ölkənin XİN başçısı Aviqdor Liberman isə vurğulayıb ki, Suriya İsraillə müharibəyə başlasa, həm müharibəni uduzacaq, həm də Bəşər Əsəd prezident kürsüsünü itirəcək.
   
   

MOSKVA və Suxumi arasında gərginlik yaşanmaqdadır. RİA "Novosti"nin məlumatına görə, gərginliyin yaşanmasına səbəb Abxaziyada Rusiya vətəndaşlarının hüquqlarının kobud şəkildə pozulmasıdır. Onlardan əllərindəki mənzilləri qeyri-qanuni olaraq alınır. Rusiya Xarici İşlər Nazirliyinin rəsmisi İqor Frolovun sözlərinə görə, bununla bağlı təmsil etdiyi quruma Abxaziyada yaşayan ruslar tərəfindən çoxsaylı müraciətlər daxil olmaqdadır. Rusiyalı diplomatlar isə bu müraciətlərə ciddi yanaşaraq Abxaziya XİN-ə sorğular göndərirlər.
   
   

ŞİMALİ Koreya uzun illər Birləşmiş Ştatların "qara siyahı"sında terrorizmi dəstəkləyən ölkələrdən biri kimi təqdim edilməkdən canını qurtara bilər. ABŞ prezidenti Barak Obama bu ölkəni təkrar terrorizmi dəstəkləyən dövlətlər siyahısına salmamağa qərar verdiyini açıqlayıb. Hansı ki dövlət katibi Hillari Klinton son çıxışında Şimali Koreyanın yenidən həmin siyahıya salına biləcəyini bildirmişdi. Obamanın bu dəfə Konqresə göndərdiyi məxfi məruzədə Şimali Koreyanın təkrar terrorizmi dəstəkləyən dövlət olaraq tanınmasına lüzum olmadığı qeyd edilir. Beləliklə, Obama keçmiş prezident Corc Buşun 2008-ci ildə "terrorizm siyahısı"ndan çıxardığı Şimali Koreya ilə mövcud status-kvonu saxlamağa qərar verib.