Tələbə Qəbulu üzrə Dövlət Komissiyası bu gün Bakıda 2009/2010-cu tədris ili üçün ali məktəblərə qəbul imtahanlarının elmi-statistik təhlilinə həsr olunmuş zona müşavirəsi keçirəcək. Qurumun mətbuat xidmətinin rəhbəri Elnur Nağızadənin "Həftə içi"nə verdiyi məlumata istinadən, tədbirdə komissiya sədri Məleykə Abbaszadə mövzu ilə bağlı məruzə edəcək. Zona müşavirəsində Təhsil Nazirliyinin, Bakı şəhəri üzrə Təhsil İdarəsinin rəhbərliyi, eləcə də Binəqədi, Əzizbəyov, Nərimanov, Nəsimi, Nizami, Qaradağ, Sabunçu, Səbail, Suraxanı, Xətai, Yasamal, Şuşa, Zəngilan, Xocalı və Xocavənd rayonlarının qabaqcıl məktəblərinin direktorları, habelə müəllimlərinin iştirakı nəzərdə tutulur. Qeyd edək ki, zona müşavirəsi Nəsimi rayonundakı 1 saylı orta məktəbin iclas zalında saat 11:00-da başlayacaq. Müşavirələrdə adıçəkilən rayonların orta məktəb məzunlarının qəbul imtahanlarında göstərdikləri nəticələr geniş müzakirə olunacaq. Xatırladaq ki, 2009/2010-cu tədris ili üçün tələbə qəbulunun nəticələrinin elmi-statistik təhlili nəticəsində əldə olunmuş zəngin elmi materiallar "Abituriyent" jurnalının 12-ci sayında dərc edilməklə yanaşı, www.abiturient.az internet səhifəsində yerləşdirilib.
   
   Bundan başqa, respublikanın bütün şəhər və rayonları üzrə ötən il məzunların qəbul imtahanlarındakı nəticələrinə dair xüsusi statistik məlumat kitabları hazırlanıb. Həmin nəşrlərdə müvafiq bölgənin məzunlarının imtahan fənləri üzrə göstəriciləri, topladıqları ballar haqda məlumatlar, onlardan ayrı-ayrı təhsil ocaqlarına qəbul olanların sayı, bölgənin hər bir məktəbini təmsil edən orta statistik abituriyent nəticələri və qəbulolma göstəriciləri əksini tapıb. Bu kitablar ölkənin təhsil şöbələrinə və orta məktəblərinə təmənnasız paylanılıb.