Fevralın 1-dən etibarən İrana gedən Azərbaycan vətəndaşları viza almırlar. Bu barədə İran hökumətinin birtərəfli qaydada verdiyi qərar artıq qüvəyə minib. Amma maraqlıdır ki, həmin qərara əsasən, azərbaycanlı jurnalistlər bu hüquqdan yararlana bilməyəcəklər.
   
   Bu barədə İran xarici işlər nazirinin müavini Həsən Qaşqavi də bir neçə gün öncə Bakıda səfərdə olarkən ayrıca xəbərdarlıqla çıxış etmişdi. Maraqlıdır ki, istənilən ölkəyə gediş-gəliş zamanı müəyyən əngəllərlə yalnız xüsusi təhlükəli vətəndaşlar - təhlükəsizlik xidməti əməkdaşları, hərbçilər, həmin dövlətin ünvanına müəyyən səviyyələrdə çıxışlar etmiş şəxslər və s. üzləşirlər.
   
   Amma mətbuat nümayəndələrinin bu cür amansız davranışla üz-üzə qalması doğrudan da başadüşülməyəndir. İranın ölkəmizdəki səfirliyinin mətbuat xidmətinin əməkdaşı Əli Namdardan aldığımız məlumata əsasən, bu ölkəyə getmək istəyən o jurnalistlərdən viza tələb olunmayacaq ki, onların məqsədi şəxsi xarakterlidir - ya müalicə olunmaq istəyirlər, ya da sadəcə, gəzmək niyyəti ilə səfərə çıxırlar. Peşə borcunu yerinə yetirmək üçün isə İran sərhədini ancaq viza alandan sonra keçmək mümkündür. Səfirlik əməkdaşı bu şərtin guya jurnalistlərin İranda olarkən sərbəst fəaliyyət göstərmələri, dövlət orqanları ilə asan təmas qurmaları üçün qoyulduğunu dedi.
   
   Amma bu, doğrudan da mı belədir, Məsələ ondadır ki, bayaq yuxarıda istənilən dövlət üçün təhlükəli görülən vəzifə sahiblərinin deyil, məhz jurnalistlərin bu cür əngəllə üzləşdirilməsi güman ki, Tehranın media mənsublarının azad sözə üstünlük verən qələmindən çəkindiyini göstərir. Bu yerdə bir neçə əyani misal çəkək: bir neçə il öncə İranın Bakıdakı Mədəniyət Mərkəzində olarkən qurumun əməkdaşı Kamrani ilə söhbət əsnasında bu məsələyə az da olsa işıq salmışdım. Ona "niyə 1 dəfə də olsun mənim İrana səfərimi reallaşdırmadınız" sualını verdim. Cavabında bildirdi ki, "jurnalistlər İrana gedib-qayıdandan sonra ağızlarına gələni yazırlar, ona görə də sizləri ora göndərə bilmirik. Amma istəsən, səni zəvvarların dəstəsində Məşhədə göndərə bilərik ki, nəticədə İranı gəzib-görərsən". Bu isə ona işarədir ki, İran hökuməti həmişə azad söz sahibləri olan biz jurnalistlərə etibar etmir. Güman ki, indiki məlum qərarı verməkdə məqsəd də jurnalistlərin İrandan qayıdandan sonra daxili problemləri işıqlandırmasının qarşısını almaqdır. Onu da deyək ki, İran tərəfi narahat edən məqam ölkənin daxili sirri saydığı məlumatların sonradan İsrail və onun ABŞ kimi müttəfiqlərinin əlinə keçməsidir. Yeri gəlmişkən, dünən İran səfirliyindən aldığımız daha bir məlumata görə, bu ölkənin səfiri Məhəmmədbağır Bəhrami yaxın 2-3 gün ərzində mətbuat konfransı keçirərək jurnalistləri incik salan məlum qərara aydınlıq gətirəcək.
   
   

"Gündəlik Azərbaycan" və "Realnıy Azerbaydjan" qəzetlərinin həbsdə olan baş redaktoru Eynulla Fətullayevdən götürülmüş qan və sidik analizlərinin nəticələri açıqlanıb. Bu barədə "Həftə içi"nə jurnalistin vəkili İsaxan Aşurov məlumat verib.
   
   Onun sözlərinə görə, analizin nəticələrinə əsasən, E.Fətullayevin qanında az miqdarda heroin aşkar edilib. Lakin vəkil analizin nəticələri ilə razılaşmadıqlarını vurğulayıb. Qeyd edək ki, yurnalistin atası Emin Fətullayev və vəkili İ.Aşurov məhkəmə narkoloyi ekspertizasının rəyi barədə fevralın 1-də də mətbuata açıqlama veriblər. Onlar bildiriblər ki, həmin rəyə əsasən, E.Fətullayev narkotik maddələrə aludəçilikdən əziyyət çəkmir və onun məcburi müalicəyə ehtiyacı yoxdur.
   
   Ədliyyə Nazirliyi Peniternsiar Xidmətin ictimaiyyətlə əlaqələr şöbəsinin rəisi Mehman Sadıqov isə "Həftə içi"nə bildirdi ki, ekspertizanın keçirilməsi təmsil etdiyi qurumun səlahiyyətində olmadığı üçün bu barədə dəqiq informasiya verə blməz: "Bu, bilavasitə istintaqın səlahiyyətindədir. İstintaq bunu ekspertizaya göndərəndə bütün nəticələr barədə də məlumat verilir. Penitensiar Xidmət olaraq bizdə ekspertizanın nəticələri yoxdur". Jurnalistin məcburi müalicə olunub-olunayacağına gəlincə isə M.Sadıqov diqqətə çatdırdı ki, bu yalnız məhkəmənin qərarı ilə həyata keçirilə bilər:
   
   "Əgər məhkəmə prosesi zamanı bu və ya digər şəxsə azadlıqdan məhrumetmə cəzası təyin olunubsa, ekspertizanın rəyindən asılı olaraq həmin şəxsə narkomaniya və ya alkoqolizmdən məcburi müalicə tətbiq olunmasına məhkəmənin qərar çıxarmaq səlahiyyəti var. Buna lüzum varsa, Cinayət Məcəlləsinin 93.1.4 maddəsinə əsasən, həmin şəxs azadlıqdan məhrumetmə yerlərində saxlanıldıqda narkomaniyadan məcburi müalicə kursu keçir. Penitensiar Xidmət çıxarılan hökmü icra edir. Onun müalicəsinin başa çatması da məhkəmə qaydasında həll olunur".
   
   İstintaqı aparan Qaradağ rayon Prokurorluğu ilə əlaqə saxladıq. Prokuror müavini Fikrət Əsgərov bildirdi ki, bu məsələylə bağlı Respublika Prokurorluğunun mətbuat xidməti açıqlama verə bilər. Adıçəkilən quruma zəng vursaq da, cavab verən olmadı. Xatırladaq ki, "Gündəlik Azərbaycan" və "Realnıy Azerbaydyan" qəzetlərinin sabiq baş redaktoru Eynulla Fətullayev 2007-ci il aprelin 20-də həbs edilib. Yurnalist 2005-ci ildə qələmə aldığı "Qarabağ gündəliyi" adlı silsilə yazılarında xocalılıları təhqir etməkdə günahlandırılıb və ona 2 il 6 ay həbs cəzası verilib. Tutulandan sonra ona əlavə ittihamlar irəli sürülüb və yurnalist 2007-ci il oktyabrın 30-da 8 il 6 ay müddətinə azadlıqdan məhrum edilib. 2009-cu il dekabrın 30-da isə 12 saylı cəzaçəkmə müəssisəsində saxlanılan E.Fətullayevin üzərində 0,223 qram həcmində heroin aşkarlanıb. Bununla əlaqədar olaraq ona qarşı Qaradağ RPİ-nin istintaq şöbəsində Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi qaldırılıb.
   
   

ABŞ prezidenti Barak Obama Konqresə 2011-ci ilin dövlət büdcəsi layihəsini təqdim edib. Ermənistanın "Panarmenian" agentliyinin Amerika Erməni Milli Komitəsinə (AEMK) istinadən yaydığı məlumatda vurğulanır ki, büdcə layihəsində İrəvana 40 milyon dollar yardımın göstərilməsi əksini tapıb. Bu rəqəm 2010-cu illə müqayisədə təqdim olunan vəsaitdən 10 milyon dollar çox, Konqresin ayırdığı maliyyə yardımından isə 1 milyon dollar azdır. Qeyd edək ki, Konqresdəki Ermənistana dəstək qrupu İrəvana 70 milyon dollar həcmində yardımın göstərilməsini istəyirdi. Budcə layihəsində Azərbaycanla Ermənistan arasında hərbi paritet də qorunub. Belə ki, hər iki dövlətə 3,5 milyon dollar həcmində hərbi yardım ayrılıb. AEMK-nın bəyanatında vurğulanır ki, uzun illər ərzində Ağ Ev hərbi yardımların həcmini Azərbaycanın xeyrinə dəyişməyə səy göstərib. Lakin hər dəfə Konqresin müdaxiləsindən sonra bu hərbi paritetlik qorunub-saxlanılıb. Hökumət İMET proqramı çərçivəsində Azərbaycana 900 min, Ermənistana isə iki dəfə az - 450 min dollar vəsait ayırmaqla yenə də iki ölkə arasında paritetliyin qorunması prinsipinə əməl etmir. Məlumatda o da bildirilir ki, Obama gələn il üçün Azərbaycana 22,12 milyon dollar vəsaitin ayrılmasını təklif edib. Bu, keçən illə müqayisədə Konqresin ayırdığı yardımdan 120 min dollar çoxdur. Ümumilikdə isə prezident Obama Avropa və Avrasiya dövlətlərinə 599.164.000 dollar, yəni keçən illə müqayisədə 11.818.000 dollar az vəsait ayrılmasını istəyib. "Biz Obamanın Ermənistana 2010-cu illə müqayisədə 10 milyon dollar çox yardımın ayrılması təklifini, həmçinin Ermənistanla Azərbaycan arasında hərbi paritetliyin qorunması istəyini alqışlayırıq. Biz həmçinin konqresmenlər Adam Şiff, Frenk Pallone, Anna Eş, Cek Speyer və Nit Louya Ermənistana yardımın artırılması istiqamətindəki səylərinə görə təşəkkürümüzü bildiririk", - deyə AEMA-nın bəyanatında vurğulanır. Qeyd edək ki, 2010-cu ilin fiskal büdcəsində Ermənistana yardımların 38 faiz azaldılması və hərbi paritetin Azərbaycanın xeyrinə dəyişilməsi nəzərdə tutulurdu. Konqresin müvafiq alt komitəsi 2011-ci ildə xarici dövlətlərə ayrılan yardımların həcmi məsələsini müzakirə etidikdən sonra məsələ Nümayəndələr Palatası və Senatın müzakirəsinə çıxarılacaq.
   
   

"Oman yaxın vaxtlarda Bakıda səfirliyini açmağı planlaşdırır" - bu fikirləri dünən Omanın xarici işlər naziri Yusif ibn Alivi ibn Abdulla Bakıda jurnalistlərin suallarını cavablandırarkən səsləndirdi. Onun sözlərinə görə, iki ölkə arasında qarşılıqlı əməkdaşlıqla bağlı bir sıra sazişlər mövcuddur. Həmçinin ikitərəfli münasibətlərin inkişaf etdirlməsi ilə bağlı plan da qəbul olunub: "Biz Azərbaycanla qarşılıqlı əməkdaşlığımızı genişləndirmək niyyətindəyik, bu, diplomatiya sahəsinə də aiddir. Biz Omanda Azərbaycan səfirliyinin fəaliyyətə başlayacağından şadıq". Qonaq Dağlıq Qarabağ münaqişəsinə də toxundu. "Dağlıq Qarabağ Azərbaycanın ərazisidir və biz ümid edirik ki, bu problem sülh yolu ilə həll olunacaq", - deyə Yusif ibn Alivi ibn Abdulla bildirdi. Dünən o, azərbaycanlı həmkarı Elmar Məmmədyarovla da görüşüb. XİN mətbuat xidmətindən aldığımız məlumata görə, görüşdə ikitərəfli əməkdaşlığın genişləndirilməsi və perspektivləri məsələsi də müzakirə edilib.
   
   

Dünən Sənaye və Energetika Nazirliyində Rumıniyanın ticarət, iqtisadiyyat və biznes mühiti nazirinin müavini, Azərbaycan - Rumıniya enerji məsələləri üzrə işçi qrupunun sədri Tudor Serbanın başçılıq etdiyi nümayəndə heyəti ilə görüş keçirilib.
   
   
   
   Görüşün məqsədi haqqında məlumat verən sənaye və energetika naziri Natiq Əliyev bildirib ki, Rumıniya Azərbaycandan təbii qaz almaq istəyir. O bildirib ki, Rumıniya prezidenti iki ölkə arasında enerji sahəsində əməkdaşlıq edilməsini təklif edib. Azərbaycan prezidentinin də bununla bağlı nazirliyə tapşırıqlar verdiyini deyən nazir Azərbaycanın hasil etdiyi təbii qazın həcminin bu əməkdaşlığa imkan yaratdığını bildirib: "Azərbaycan dünyanın enerji təhlükəsizliyində getdikcə daha önəmli rol oynamağa başlayır. 2009-cu ildə dünya maliyyə böhranına baxmayaraq, Azərbaycanda ümumi daxili məhsul 9,3 faiz artıb. Təbii ki, bu artımda hasil etdiyimiz xam neft və təbii qazın xüsusi rolu olub. 2009-cu ildə 51,25 milyon ton xam neft, 23 milyard kubmetr təbii qaz hasil etmişik. Bu göstəriciləri neft sahəsində 2010-cu ildə 52,5 milyon tona və təbii qaz hasilatında 28,5 milyard kubmetrə qaldırmaq niyyətindəyik. Azərbaycan gündə 900 min barrel xam nefti dünya bazarına çıxarır. Azərbaycan dünyanın enerji təhlükəsizliyinə böyük önəm verir. Fəxr ediləsi haldır ki, bu gün Azərbaycan nefti Gürcüstan, Rusiya, İran və Türkiyə bazarlarına çıxarılır".
   
   Hazırda əsas müzakirə edilən məsələnin Azərbaycan qazının maye qaz şəklində Rumıniyaya çatdırılması olduğunu deyən N.Əliyev vurğulayıb ki, qazın maye formasına çevrilməsi üçün Gürcüstanda maye qaz zavodunun tikintisi müzakirə obyektidir: "İlkin təhlillər aparılıb və bu təhlillər göstərir ki, belə bir zavodun tikintisi mümkündür. Rumıniya Azərbaycana üçtərəfli anlaşma memorandumu göndərib. Eyni zamanda Azərbaycan və Rumıniya arasında enerji sahəsində əməkdaşlıq protokolunun imzalanması müzakirə olunur. İki ölkə arasında razılaşma olarsa, bizə daha sonra Gürcüstan da qoşula bilər".
   
   İki ölkə arasında əməkdaşlığın inkişaf etdiyini deyən Rumıniya nümayəndə heyətinin rəhbəri Tudor Serban isə ölkəsinin Azərbaycanın müstəqilliyini tanıyan ilk Avropa ölkəsi olduğunu vurğulayıb. O, Rumıniyanın Azərbaycanla enerji sahəsində əməkdaşlığa xüsusi önəm verdiyini diqqətə çatdırıb.
   
   Müzakirələr daha sonra kütləvi informasiya vasitələrinin iştirakı olmadan davam etdirilib. Tədbirin fasiləsində jurnalistlərə açıqlama verən N.Əliyev deyib ki, nümayəndə heyətləri arasında enerji əməkdaşlığı ilə bağlı müzakirələr davam edir. Nazir Azərbaycanın üzərinə düşən əsas işin təbii qazı maye qaz zavoduna çatdırmaq olduğunu qeyd edib: "Əsas işimiz ondan ibarətdir ki, müqavilənin qüvvədə olduğu müddətdə öhdəlikləri yerinə yetirək. Müqavilənin yerinə yetirilməsində lazım olan maliyyə xərcləri özəl şirkətlərin hesabınadır. Qazın da qiyməti var - dünya bazarında hansı qiymətədirsə, həmin qiymətə qazı emal müəssisəsinə çatdıracağıq. Biz Rumıniya tərəfi ilə bu haqda danışmışıq".
   
   

MƏhmƏt Əli Ağcanın vəkili Şövkət Can Özbay dünən qatıldığı televiziya proqramında tamaşaçıları heyrətə gətirən bir sirr açıqlayıb. O, müdafiə etdiyi Əli Ağcanın vaxtilə Sabina Castelfranco adlı italiyalıya yazdığı məktubun əl yazısını ekranlarda nümayiş etdirib. "İnternethaber"in məlumatına görə, sonra isə 2001-ci ildə ingiliscə yazılmış məktubun tam mətnini oxuyub: "Sevgili Sabina, Roma papasını sovet "KQB"sinin tapşırığı ilə vurdum. Sui-qəsd planını reallaşdırmaq göstərişini isə Bolqarıstanın məxfi idarəsində çalışan cənab Kuzinskidən aldım. Daha sonra Bolqarıstan məxfi idarəsinin Roma şöbəsinin rəhbəri Donchevle görüşdüm. O, Roma papasından sonra polşalı siyasətçi Lex Valensanı öldürməyi planlaşdırmışdı. İmza: Məhmət Əli Ağca". Məhmət Əli Ağca 2001-ci ildə İtaliya həbsxanasından çıxıb Türkiyəyə döndüyü əsnada yazıçı-jurnalist Abdi İpəkçini öldürdüyünə görə yenidən həbs olunub. Ağca məhbəsdə olarkən sözügedən məktubu Castelfrancoya çatdırmaq məqsədilə vəkilinə vermişdi. Amma C.Özbay məktubu itirdiyi üçün lazımi ünvana çatdıra bilməmişdi. Buna baxmayaraq o, 10 il sonra - bu yaxınlarda arxivində səliqə-sahman yaradarkən məktubun əlyazmasını tapıb və ekranlara çıxarıb. Onu da deyək ki, Özbay proqram əsnasında Əli Ağcanın ona vəkil haqqı olaraq indiki dəyərlə 7500 lirə (3500 dollar) borcu qaldığını bildirərək ondan həmin pulu ödəməsini tələb edib.

AzƏrbaycanın Dini Qurumlarla İş üzrə Dövlət Komitəsində fevralın 2-də daha 30 dini icmaya müvafiq qeydiyyat sənədləri təqdim edilib. Dövlət komitəsindən "Həftə içi"nə daxil olan məlumata görə, şəhadətnamələri təqdim edən qurumun sədri Hidayət Orucov dini ibadət yerlərinin təmiri, tikintisi və bərpası istiqamətində görülən işlər haqqında geniş məlumat verib, dini icmaların qeydiyyatdan keçməsi ilə əlaqədar işlənib-hazırlanan qanunvericilik sənədlərini dövlətçiliyin gücləndirilməsində çox mühüm mərhələ olduğunu qeyd edib. Mərasimdə islam təmayüllü icmalarla yanaşı, qeyri-islam dini icmalarının rəhbərləri də iştirak ediblər. Qeyd edək ki, bununla da Azərbaycanda təkrar dövlət qeydiyyatına alınan dini icmaların sayı 200-ü ötüb.
   
   
   
   

Milli Məclisdə əyləşən parlamentarilər içərisində deputat mandatına ən çox sahib olmuş millət vəkillərindən biri Əhəd Abıyevin seçildiyi dairənin ləğvi, yaxud həmin dairədən digər şəxslərin seçilməsi ilə bağlı mətbuatda müxtəlif məlumatlar yer almaqdadır. Hətta millət vəkilinin qarşıdakı parlament seçkilərində mandatsız qoyulmasından sonra həbs olunacağı belə yazıldı. Ə.Abıyevin əsasən vaxtilə Bakı şəhər İcra Hakimiyyətində işlədiyi dövrdə qeyri-qanuni olaraq BŞİH-in balansında olan binaların zirzəmilərini müəyyən şəxslərə satması, eyni zamanda, yaxın ətrafında olan adamlara peşkəş etməsi belə yazıldı. Məlumatlara görə, millət vəkilinin son zamanlar yerli icra hakimiyyəti və digər orqanlarla qanlı-bıçaq olmasından sonra onun keçmiş fəaliyyəti də araşdırılmağa başlanıb. Ə.Abıyev "Həftə içi"nin bununla bağlı suallarını cavablandırarkən bildirdi ki, haqqında səsləndirilən bu cür məlumatların əsası yoxdur: "Mən Bakı şəhər İcra Hakimiyyətində işləyəndə haranı satmışam? Belə məlumatlar hardan çıxır... Qoy gedib yoxlasınlar. Mən bəyəm şəhər meri idim ki, balansda olanları satım? Bunlar ağ yalan olmaqla yanaşı, mənə qarşı yönələn ən iyrənc iftiralardır". Millət vəkilindən belə məlumatlar əsasında seçki dövründə rəqiblərinin ona qarşı "qara piar" kimi istifadə edə bilməsi ehtimalını da soruşduqda isə bildirdi ki, o hansısa rəqibindən çəkinmir və bu cür məlumatlar əsasında formalaşdırılacaq "piarlar" nəticə verməz: "Mənim Masallıda qohum-əqrəbamı, yaxın dost-tanışlarımı nəzərə alsanız, 20 mindən artıq seçici deməkdir. Faktik olaraq bu gün 20 mindən artıq seçici seçki gününə hazırdır. Buna kimsənin şübhəsi olmasın. Mənim 20 min seçicim var, amma Azərbaycanda 20 min erməninin olduğunu da yaddan çıxarmayın".