1 aydan çox davam edən fasilə başa çatır və artıq çərşənbə axşamından etibarən "Unibank" premyerliqası finiş xəttinə qədəm qoyur. Birinci və ikinci "altılıq"larda qərarlaşacaq komandaları birdəfəlik müəyyənləşdirmək üçün daha 5 tur oynanılmalıdır.
   
   
   
   Avrokuboklara vəsiqə, bu üzdən də, təbii ki, ilk "altılıq" uğrunda mübarizə aparan "Simurq" finiş xəttinə Yevlaxda çıxır. Məhz bu oyundan "Simurq"un mübarizəyə nə dərəcədə hazır olduğunu sezmək mümkün olacaq.
   
   Bir vaxtlar "Karvan" "sarı-qaralar" üçün ən arzuolunmaz rəqiblərdən idi. "Simurq" yevlaxlılar üzərində ilk qələbəsini qazanmaq üçün təsis olunduğu gündən sonra 3 il gözləmək məcburiyyətində qaldı. Amma 2008-ci ilin oktyabrında baş tutan o qarşılaşmadan bu yana Roman Pokoranın yetirmələri "Karvan"a şans vermir: 3 oyun - 3 qələbə.
   
   Bu, tərəflər arasında yubiley oyunu olacaq və indiyədək baş tutan 9 qarşılaşmanın balansı tamamilə simmetrikdir: 3 qələbə "Simurq"un, 3 qələbə "Karvan"ın aktivində var. Digər 3 qarşılaşma isə heç-heçə nəticələnib (hamısı - 1:1!)
   
   
   
   2006/07. Premyerliqa. "Simurq" - "Karvan" - 1:1 (Ramin Hacıyev - Yakuba Bamba)
   
   
   
   "Karvan" - "Simurq" - 3:0 (Süleyman Kamara - 2, Mətləb Məmmədov)
   
   
   
   Azərbaycan kuboku. "Simurq" - "Karvan" - 1:1 (İlqar Əbdürrəhmanov - pen. - Yakuba Bamba)
   
   
   
   "Karvan" - "Simurq" - 1:0 (Yakuba Bamba)
   
   
   
   2007/08. Premyerliqa. "Simurq" - "Karvan" - 0:1 (Roman Axalkatsi)
   
   "Karvan" - "Simurq" - 1:1 (Aqşin Ömərov - pen. - Roman Axalkatsi)
   
   
   
   2008/09. Premyerliqa. "Simurq" - "Karvan" - 2:0 (Tural Cəlilov - 2)
   
   
   
   "Karvan" - "Simurq" - 1:3 (Murad Ağakişiyev - Vladimir Mazyar - 2, Tural Cəlilov)
   
   
   
   2009/10. Premyerliqa. "Simurq" - "Karvan" - 2:0 (Elşən Məmmədov, Ruslan Qunçak)
   
   
   
   Ölkə çempionatlarının gümüş və bürünc mükafatçısı, Azərbayca kubokunun finalçısı, UEFA kubokunda mərhələ adlayan ilk Azərbaycan klubu indi çətin dövrlərini yaşayır. Komandanı yenə tarixinin ən uğurlu məşqçisi Yunis Hüseynov çalışıdırsa da, bugünkü "Karvan" dərin böhran içindədir; komanda 17 turdan sonra cəmi 7 xal toplayıb və sonuncu pillədə qərarlaşıb. İndi kollektivin qarşısına yalnız bir məqsəd qoyulub: premyerliqada qalmaq. Bu istiqamətdə fasilə dövründə müəyyən işlər görülüb və komandanın heyəti Zaur Ramazanov, Emin Quliyev, Füzuli və Xaqani Məmmədovlar kimi ölkə çempionu olmuş, Azərbaycan yığmasının şərəfini qorumuş futbolçularla gücləndirilib. Bundan əlavə, Rövşən Əmiraslanov, Şəhriyar Rəhimov və Murad Xamroyev də mövsümün sonuna qədər yevlaxlıların şərəfini qoruyacaq. Bir sözlə, Yunis Hüseynov müəyyən qədər rəqabətə davamlı heyət toplaya bilib və təcrübə hesabına "Karvan"ı belə çətin vəziyyətdən çıxarmağa çalışacaq. İlk imtahan isə bürünc mükafatçı "Simurq" qarşısında veriləcək.
   
   "Simurq"un da heyətində bir futbolçu var ki, bu komandaların duelində əhəmiyyətli mövqeyə malikdir, amma hazırda start heyətinə düşməkdə çətinlik çəkir. Roman Axalkatsi "Karvan"da çıxış etdiyi vaxtlarda 2 dəfə "sarı-qaralar"ı məyus edib, indi isə özü sarı-qara formanı geyinir. Yəqin, Axalkatsi üçün Yevlaxda "Karvan"la qarşılaşma xüsusi prinsipiallıq daşıyar və gürcüstanlı futbolçu vaxtilə ona doğma olan tribunalara özünü bir daha göstərməyə çalışacaq.
   
   Amma istənilən halda start heyəti qurmaq baş məşqçinin səlahiyyətlərinə daxildir və şübhə yoxdur ki, həmin heyətin qarşısında yalnız bir məqsəd qoyulacaq: qələbə!