Rabitə və İnformasiya Texnologiyaları Nazirliyinin (RİTN) mətbuat xidmətinin rəhbəri Müşfiq Əmirovun "Həftə içi"nə verdiyi məlumata görə, ötən il nazirlik üzrə 273 yeni iş yeri açılıb: "Ötən il əhaliyə göstərilən rabitə xidmətlərinin həcmi 98,1 milyon manata çatdırılıb.
   
   
   
   Birlik və müəssisələr üzrə 232,7 milyon manat proqnoza qarşı 251,5 milyon manat gəlir əldə edilib. Həmin qurumlar dövlət büdcəsinə 34, DSMF-yə isə 11,7 milyon manat vəsait ödəyib. Onlar 47,1 milyon manat investisiya qoyublar. İnvestisiya layihələri çərçivəsində ölkənin ümumi telefon şəbəkəsi üzrə 57.202 nömrə (RİTN üzrə 53.891 nömrə) tutumlu yeni ATS-lər istifadəyə verilərək, ümumistifadəli sabit telefon şəbəkəsinin tutumu 1.562.113 nömrəyə (RİTN üzrə 1.403.499 nömrə) çatdırılıb".
   
   Bölgələrdə telefon şəbəkəsinin modernləşdirilməsinə və yeni texnologiyaların tətbiqinə 22,4 milyon manatdan artıq investisiya yönəldilib və nəticədə 86.358 nömrə tutumlu EATS-lər, 288,5 km uzunluğunda fiber-optik kabel magistralları və birləşdirici xətlər, 12.741 abunəçi xətti istismara verilib. Saatlı və Gədəbəy rayonları tam elektronlaşdırılıb: "Rayon mərkəzi ATS-ləri tam elektron olan rayon və şəhərlərin sayı 50-yə, telefon şəbəkələri elektronlaşdırılmış rayonların sayı isə 28-ə çatdırılıb. Ötən il 3528 yeni istifadəçinin qoşulması ilə genişzolaqlı şəbəkənin ümumi tutumu 4912-ə, bu xidmətlərin təşkil olunduğu şəhərlərin sayı isə 51-ə çatdırılıb".
   
   400 taksofon alınacaq
   
   
   
   Taksofon parkının yeniləşdirilməsi və yeni texnologiyalı taksofonların tətbiqi üçün 500 ədəd yeni kartlı taksafon aparatının alınması məqsədi ilə bağlanmış müqaviləyə uyğun olaraq 110 ədəd taksofon aparatı alınaraq quraşdırılıb və daha 400 ədəd taksofon aparatının alınıb quraşdırılması üçün tədbirlər görülür. Ötən il əsas telefon aparatlarının ümumi sayı 86.842 ədəd (RİTN üzrə 82.431 ədəd) artırılaraq 1.395.598 ədəd (RİTN üzrə 1.255.001 ədəd) təşkil edib: "Ölkə üzrə əhalinin hər 100 nəfərinə düşən telefon aparatlarının sayı 16 ədəd olub. Bu göstərici Bakı üzrə 34,4, bölgələrdə isə 10,5 ədəd təşkil edib. Kənd yerlərində hər 100 nəfər əhaliyə düşən telefon aparatlarının sayı 6,9 ədədə çatdırılıb. Mobil abunəçilərin sayı ilin əvvəlinə nisbətən təxminən 1.209.120 nəfər artaraq 7.757.120 nəfər olub ki, bu da hər 100 nəfərə 86,2 nəfər mobil abunəçinin düşməsi deməkdir. Hazırda Bakı ilə yanaşı, digər şəhər və rayonlarda genişzolaqlı şəbəkə xidmətlərindən istifadə edən abunəçilərin sayı 64.500-ü ötüb.
   
   
   
   50 min nəfərə sertifikat
   
   veriləcək
   
   
   
   Ötən il dünya ölkələrindən Azərbaycana daxil olan beynəlxalq giriş trafikinin həcmi 588,5, çıxış trafikinin həcmi isə 158,4 milyon dəqiqə təşkil edib. Beynəxalq telefon kanallarının sayı 5800-ə çatıb: "Azərbaycanın beynəlxalq rabitə sisteminin dayanıqlılığının artırılması, optik şəbəkənin buraxılma imkanlarının genişləndirilməsi məqsədi ilə BƏHM ilə "Optik Rabitə Tikinti-Quraşdırma" MMC arasında imzalanmış müqavilə əsasında başlanılmış Siyəzən - Dəvəçi - Quba - Samur istiqamətində fiber-optik magistralın tikintisi sona çatmaq üzrədir. Ötən il müxtəlif tipli avadanlıqların mülki dövriyyəsinə 67 ədəd xüsusi icazə, telekommunikasiya vasitələri və qurğularına 452 ədəd "Uyğunluq sertifikatı", sürətli poçt rabitəsi xidmətləri üzrə 12 ədəd (6 ədəd yeni), telekommunikasiya xidmətləri üzrə isə 20 ədəd (16 ədəd yeni) xüsusi razılıq (lisenziya) verilib və 159 min manat dövlət rüsumunun dövlət büdcəsinə ödənilməsi təmin edilib". Heydər Əliyev Fondu ilə birgə RİTN tərəfindən "Kor və görmə qabiliyyəti zəif olan insanlar üçün İKT" layihəsinin həyata keçirilməsindən ötrü işçi qrup yaradılıb və layihə çərçivəsində Gəncədə ixtisaslaşdırılmış regional kompüter mərkəzinin yaradılması üzrə işlər başa çatmaq ərəfəsindədir. Analoji mərkəzin Naxçıvan MR-də yaradılması barədə RİTN ilə Heydər Əliyev Fondu arasında əməkdaşlıq sazişi imzalanıb. İKT-nin məktəblərdə tətbiqi və məktəblərin sürətlə internetə qoşulmasında, vergi və gömrük xidmətlərində, səhiyyədə, pensiya və müavinətlərin ödənilməsində, cəmiyyətin hərtərəfli informasiyalaşdırılmasında xüsusi aktivlik hiss olunur. "Elektron hökumət" həllərinin tətbiqinin genişlənməsi, şəffaf və nəzarət oluna bilən dövlət idarəetməsinin yaradılması da bu məqsədə xidmət edir: "Hazırda "Elektron hökumət"in formalaşdırılması üçün əsas komponentlərdən biri hesab olunan elektron-imzanın tətbiqi məqsədi ilə Milli Sertifikat Xidmətləri Mərkəzinin yaradılması başa çatdırılıb və bu ildən etibarən elektronimza ilə bağlı İD kartların dövlət hakimiyyəti orqanlarına, hüquqi və fiziki şəxslərə paylanmasına başlanılacaq".
   
   
   
   246 REV
   
   qeydiyyatdan silinib
   
   
   
   M.Əmirov onu da dedi ki, xüsusi beynəlxalq televiziya kanalının yaradılması məqsədi ilə 2009-cu il dövlət büdcəsinin ehtiyat fondundan RİTN-ə 1.617.131 manat (1.088.491 manatı peyk yerüstü stansiya və TV yayım avadanlığının alınıb quraşdırılması və 528.640 manatı isə ATV-İNT kanalının "Türksat-3A" peykindən və HOTBİRD peykindən Avropaya yayımı üçün seqment icarə haqqı) vəsait ayrılıb. 14 sentyabr 2009-cu ildən Azərbaycanın beynəlxalq kanalı olan ATV-İNT-nin "Türksat-3A" peykindən Asiya və Yaxın Şərq ölkələrinə yayımına başlanılıb. DRİ tərəfindən ötən il 625 müəssisə və təşkilatlarda keçirilən texniki baxış zamanı dövlət qeydiyyatından keçməyən 1580 ədəd radioelektron vasitəsi (REV) aşkarlanıb: "Onlardan 749-u qeydiyyata salınıb, 229-u möhürlənib, 356-nın isə qeydiyyata salınması üçün müvafiq tədbirlər görülür. 246 ədədi isə istismara yararsız olduğu üçün müəssisələr tərəfindən silinərək qeydiyyatdan çıxarılıb. Dövlət qeydiyyatından keçməyən qanunsuz REV istifadəçilərinə qarşı İXM-in pozulması barədə 155 protokol yazılıb və müvafiq tədbirlər görülür".