Avropa zonası
   
   Sloveniya - Rusiya - 1:0
   
   Qol: Dediç, 44
   
   İlk oyun - 1:2
   
   
   
   Gələn il CAR-da təşkil olunacaq dünya çempionatına vəsiqə əldə edən son 6 yığmanın adı müəyyənləşib. Afrika, Avropa və Amerika zonasında keçirilən pley-off oyunlarında azarkeşlər maraqlı mübarizənin şahidi olublar.
   
   
   
   "Qara qitə"də qrupda eyni xal toplayan iki yığma - Misirlə Əlcəzair Sudanda qalibi müəyyən edib. Yəhyanın 40-cı dəqiqədə vurduğu qol Əlcəzair komandasına dünya çempionatında oynamaq imkanı verib. Son 2 Afrika kubokunun qalibi Misir isə növbəti dəfə azarkeşlərini məyus edib.
   
   Avropa zonasında seçmə mərhələsində millimizlə eyni qrupda yer alan Rusiya komandası uğursuzluqla üzləşib. Sloveniya yığması ilə matçlarda şimal qonşularımızın şansları yüksək qiymətləndirilsə də, sonda slovenlər gülən tərəf olub. Öz meydanında 1:0 hesabı ilə qalib gələn Sloveniya yığması Moskvada vurduğu 1 qolun sayəsində tarixində ilk dəfə dünya çempionatına yollanıb. Bosniya və Herseqovina isə eyni tarixi uğura imza ata bilməyib. Blayeviçin komandası hər iki görüşdə Portuqaliyaya uduzub.
   
   Fransa - İrlandiya görüşü maraqlı keçməsi ilə diqqəti çəkib. Səfərdən qələbə ilə dönən fransalıların doğma azarkeşlər qarşısında çətinlik çəkməyəcəyi gözlənilirdi. Amma Robbi Kinin vurduğu qol irlandiyalılara böyük ümid verib. Matç 1:0 hesabı ilə başa çatdığından əlavə vaxt təyin olunb. 113-cü dəqiqədə Fransa meydan amilindən istifadə edərək lazımi qolu vurub.
   
   Səfərdən heç-heçə ilə dönən Ukrayna isə öz meydanında bu üstünlükdən istifadə edə bilməyib. Yunanlar 1-ci hissədə hesabı açaraq dünya çempionatına yollanmaq şanslarını qaçırmayıblar.
   
   
   
   DÇ-2010, seçmə mərhələsi
   
   Pley-off matçları
   
   
   
   Afrika zonası
   
   Misir - Əlcəzair - 0:1
   
   Qol: Yəhya, 40.
   
   
   
   Avropa zonası
   
   Bosniya və Herseqovina -
   
   Portuqaliya - 0:1
   
   Qol: Raul Meyreleş, 56.
   
   İlk oyun - 0:1
   
   
   
   Fransa - İrlandiya - 1:1
   
   əlavə vaxtda
   
   Qollar: Qallas, 103 -
   
   Robbin Kin, 32.
   
   İlk oyun - 1:0
   
   
   
   Amerika zonası
   
   Uruqvay - Kosta-Rika - 1:1
   
   Qollar: Abreu, 70 - Senteno, 74.
   
   İlk oyun - 1:0

Futbol üzrə növbəti dünya çempionatında iştirak edəcək bütün yığmaların adları müəyyənləşib. 2010-cu ilin yayında Cənubi Afrika Respublikasında təşkil olunacaq ən böyük futbol bayramında 32 komanda qələbə uğrunda mübarizə aparacaq. Dünya çempionatında Avropa zonası 13 yığma ilə təmsil olunacaq. Sloveniya ilə Slovakiya isə yarşların debütantı olacaqlar.
   
   Asiya zonası
   
   Yaponiya, Avstraliya, C. Koreya, KXDR.
   
   Cənubi Amerika zonası
   
   Braziliya, Argentina, Paraqvay, Çili, Uruqvay.
   
   Avropa zonası
   
   Hollandiya, İngiltərə, Fransa, İtaliya, Danimarka, Almaniya, Slovakiya, Serbiya, İspaniya, İsveçrə, Yananıstan, Portuqaliya, Sloveniya.
   
   Afrika zonası
   
   CAR, Nigeriya, Kamerun, Qana, Kot-d""İvuar, Əlcəzair.
   
   Mərkəzi Amerika və Karib hövzəsi
   
   Mesika, ABŞ, Honduras.
   
   Okeaniya zonası
   
   Yeni Zelandiya

DÇ-2010-a vəsiqə verən Fransa - İrlandiya pley-off matçında baş verənlər uzun müddət müzakirə olunacaq. Öz meydanında 0:1 hesabı ilə məğlub olan irlandlar səfərdə bu qolun əvəzini çıxa bildi. Əlavə vaxtda isə Fransa yığmasının vurduğu qol zamanı qayda pozuntusu hakimin diqqətindən yayındı. İsveçli Mattias Hanssonun Anrinin topu əli ilə qarşısına necə atdığını görməməsi böyük polemikalara səbəb olub. Məhz Anrinin ötürməsindən sonra Qallas topu başı ilə qapıdan keçirərək "üçrənglilər"i dünya çempionatına çıxıran qolu vurub. İrlandiya yığmasının baş məşqçisi Covanni Trapattoni oyundan sonra danışmağa söz tapmayıb: "Mən çox üzgünəm. Çox xoşagəlməz axşam oldu. Yaxşı olardı ki, penalti zərbələrində uduzaydıq. Hakimin köməkçisi ilə vəziyyəti müzakirə etmək imkanı var idi. Əminəm ki, əllə oyuna görə hakim Anrini meydandan da qova bilərdi". İtaliyalı mütəxəssis "Fair play" haqqında çox danışıldığını və bütün dünyanın ədalətli oyun prinsiplərinin necə pozulduğna şahid olduğunu bildirib. Hadisənin səbəbkarı Tyerri Anri əli ilə oynadığını etiraf edib. O, həmin anda hakimin oyunu saxlamadığı üçün bütün suallara onun cavab verməli olduğunu qeyd edib.

21 yaşadƏk futbolçulardan ibarət yığmamız Avstriyadan böyükhesablı məğlubiyyətlə dönür. 4 gün əvvəl Bakıda Şotlandiya komandasına 0:4 hesabı ilə uduzan millimiz bu dəfə də eyni aqibəti yaşayıb. Hər hissədə qapısından 2 top buraxan yığmamız uğursuz seriyanı davam etdirib. Qeyd edək ki, komandamız matçı 10 nəfərlə bitirib. Oyunun 34-cü dəqiqəsində qapıçımız Elçin Sadıqov qırmızı vərəqə alaraq millimizi çətin vəziyyətdə qoyub. Yer aldığı 10-cu qrupda keçirdiyi bütün oyunlarda məğlubiyyətlə üzləşən millimiz qrupda sonuncu yeri tutur. Növbəti qələbəsini qazanan Avstriya yığması isə 1-ci pilləyə yüksəlib.
   
   
   
   Avstriya (U-21) - Azərbaycan (U-21) - 4:0
   
   Qollar: Nihui, 10; 20; 79. Veymenn, 83.
   
   

"NeftÇi" klubu "İnter"lə oyuna hazırlıq məqsədi ilə əvəzedici heyətlə yoxlama matçı keçirib. Klubun mətbuat xidmətindən "SİA"ya verilən məlumata əsasən, oyunçular milli və müxtəlif yaş qrupları üzrə yığmaların düşərgəsində olduğuna görə baş məşqçi Vafiq Sadıqov cəmi 12 futbolçunu sınaya bilib. Qeyd edək ki, əvəzedici heyətin üzvləri ilə görüş olduqca maraqlı və məhsuldar keçib. Belə ki, oyunda 6 qol qeydə alınıb. Əsas heyətdən Rəşad Abdullayev (2 qol), Samir Əliyev, Marian Aliuta və Vladimir Miçoviç, əvəzedicilərdən isə Kamil Nurəhmədov fərqlənib. Əsas heyət 5:1 hesabı ilə qalib gəlib.
   
   

BirlƏşmiş Ərəb Əmirliklərində keçirilən beynəlxalq turnirdə 3-cü yeri tutan futbol üzrə yığmamızın baş məşqçisi Berti Foqts Çexiya ilə matçdan sonra oyun haqqında danışıb. AFFA-dan verilən xəbərə görə, almaniyalı mütəxəssis futbolçularımızın çıxışından razı qalıb: "Bugünkü qələbəyə görə ilk növbədə futbolçuları təbrik etmək lazımdır. Çünki Çexiya millisinin güclü olmasına baxmayaraq, biz daha yaxşı oyun nümayiş etdirdik. İkinci qolun vurulmasına çox sevindim. Dəfələrlə künc zərbələri ilə bağlı məşq etmişik. Bu dəfə istəyimizə nail olduq - Vaqifin küncdən zərbəsini Ruslan qola çevirdi. Güman edirəm futbolçular öz klublarında məşqlərini bu səviyyədə davam etdirəcəklər". Baş məşqçi İraq yığması ilə oyuna da toxunub. Foqts həmin görüşün 1-ci hissəsində daha yaxşı oynadıqlarını bildirib.