Hindistanlı alimlər indiyədək analoqu olmayan süni insan ürəyi yaradıblar. O, adi tarakanın ürəyinin strukturuna uyğun olaraq və məhz ona əsaslanaraq yaradılıb. Böyük Britaniyanın "Time" qəzeti yazır ki, indiyədək bazarda insan ürəyinin iki növdə süni forması var idi. Lakin onların hər ikisindən istifadə böyük risk daşıyırdı. Məsələ ondadır ki, hər iki süni ürək birkameralı idi və nəticədə onun qan vurmasında problemin yaranma ehtimalı çox idi. Buna baxmayaraq həmin ürəklərin qiyməti 50 min dollara çatır.
   
   Bu dəfə hindistanlı mühəndis-bioloq Sudca Quxa tamamilə yeni formalı süni ürək yaradıb: onun bir neçə kamerası var və bu, insan orqanizminə qanın daha etibarlı və uzunmüddətli vurulmasını təmin edir. Alim etiraf edib ki, yeniliyin edilməsi ideyasını ona 5 kameradan ibarət olan tarakan ürəyi "verib". Nəticədə Quxa nə az-nə çox - düz 13 kameralı insan ürəyi yaradıb. Onun üstünlüyü yalnız etibarlılığında yox, həm də ucuzluğundadır. Yeni ürəyi 2,5 min dollar ödəməklə əldə etmək olar. Yeni ürəyin 2014-cü ildən etibarən açıq satışda olacağı gözlənilir.

- İnsan yuxuda ikən faktik iflic vəziyyətində olur.
   
   - Vaxtilə siqaret çəkmiş, sonradan onu tərgitmiş şəxslər daha parlaq və real yuxular görürlər.
   
   - Bütün insanlar yuxu görür, sadəcə, bəziləri heç zaman bunu xatırlamır.
   
   - Bəzi insanlar yuxunu ağ-qara rəngdə görürlər.
   
   - Yuxu görmək psixozun qarşısını alır.
   
   - İnsan gördüyü yuxunun 90 faizini unudur.
   
   - Kor insanlar da yuxu görür.
   
   - İnsan xoruldayan zaman yuxu görmür.
   
   - Körpələr 3 yaşınadək özlərini yuxuda görmürlər.
   
   - 3 - 8 yaş arasında olan uşaqlar böyük insanların bütün ömrü boyu gördüyündən daha çox qorxulu yuxu görürlər.
   
   - Sutkada 6 - 7 saat yuxulayan insanlarda cavan yaşlarında ölmək risqi 8 saat yuxulayanlarla müqayisədə daha azdır.
   
   - Statistikaya görə, ispaniyalılar sutkada bütün avropalılardan 40 dəqiqə az yatırlar. Fransızlar isə ən çox yuxulayan avropalılardır - 9 saat.
   
   - Orta hesabla insan, ömrünün 6 ildən bir qədər artığını yuxuda keçirir.
   
   - İnsanın yaşı artdıqca onun yuxuda keçən vaxtı da çoxalır.
   
   - "Ginnesin rekordlar kitabı"na düşmüş ən uzun yuxu 18 gün 21 saat 40 dəqiqə davam edib.
   
   - İnsan bəzən gözüaçıq halda bir neçə dəqiqə yuxulayır və özü bunu hiss etmir.
   
   - Yeni körpəsi dünyaya gəlmiş valideynlər ilk 1 ildə təxminən 400 - 750 saat yuxu itirirlər.
   
   - Heyvanlarda yuxu fazaları aşkarlansa da, onların yuxu görüb-görmədikləri elmə bəlli deyil.
   
   - Tədqiqatlar göstərir ki, avtomobil qəzalarının 20 faizi yuxusuzluq üzündən baş verir.
   
   

Maldiv Respublikasının hökuməti suyun altında iclas keçirəcək. "AFP" xəbər verir ki, bununla hökumət ictimaiyyətin diqqətini qlobal istiləşmə probleminə cəlb etmək istəyir. Artıq oktyabrın 17-də keçiriləcək iclasda iştirak etmək üçün 6 metr dərinliyə batmağı bacarmaq üçün nazirlər məşqlərə başlayıblar. İclasa respublikanın prezidenti Məhəmməd Naşid sədrlik edəcək. Prezident artıq xüsusi geyimlə dərinlikdə üzə bildiyi üçün məşqlərə qatılmır. İclas iştirakçılarının xüsusi işarələr və siqnallarla danışacaqları bildirilir.

Almaniyanın 74 yaşlı sakini Konrad Oyler Cəbəlüttariq boğazını üzərək keçməklə dünyanın ən yaşlı üzgüçüsü kimi tarixə düşüb. "DPA" agentliyinin məlumatına görə, o, 18,5 kilometr məsafəni 4 saat 9 dəqiqəyə üzüb və bu zaman hidrokostyumdan və ya digər yardımçı vasitələrdən istifadə etməyib.
   
   Oyler etiraf edib ki, ona bu rekorda imza atmaqda ən ciddi çətinlik yaradan suyun soyuqluğu olub. Əsasən 16 - 18 dərəcə hərarətə malik su Mərakeş sahillərində 14 dərəcə imiş. Lakin qocanın 2 il ərzində məşq edərək bu rekorda imza atmağa hazırlaşması onun məqsədinə çatmasına kömək edib. Qeyd edək ki, indiyədək təxminən 300 nəfər sözügedən boğazı üzərək keçməyə nail olub. Bu işdə əsas maneə suyun soyuqluğu və sürətli axınlar hesab olunur.

Polşa məhkəməsi 3 gənci həbs edib. Buna səbəb onların top əvəzinə kirpi ilə futbol oynamaları olub. "TheNews.pl" xəbər verir ki, Polşada kirpilər xüsusi mühafizə olunan heyvanlar sırasındadır və yerli qanunvericilik bu canlını incidən və ya öldürən şəxslərə xüsusi cəza nəzərdə tutur. İndi "futbolçu" gənclər 30 saat ictimai əməklə məşğul olmalıdırlar.
   
   Məhkəmə həmin gənclərin kirpilərin müdafiəsinə dair proqramı öyrənməyə də məcbur edəcək. Bundan başqa, "futbolçular" hərəyə təxminən 50 avro cərimə ödəyəcəklər. Müttəhimlər günahlarını etiraf edib, kirpinin həyatına həqiqətən də təhlükə yaratdıqlarını boyunlarına alıblar.