Dünən Bakıda səfərdə olan Minsk Qrupunun həmsədrləri bölgəyə səfərlərinin yekunları ilə bağlı birgə bəyanatla çıxış etdilər. Xarici İşlər Nazirliyində keçirilən brifinqdə həmsədrlər adından bəyanatı rusiyalı diplomat Yuri Merzlyakov səsləndirdi. Bəyanatda vurğulanır ki, Azərbaycan prezidentinə erməni həmkarı ilə Kişinyovda görüşmək təklifi gətirilib. Prezident İlham Əliyev bu görüşə razılıq verib: "Görüş oktyabrın 8-də axşam saatlarında Müstəqil Dövlətlər Birliyinin sammitindən öncə olacaq. Kişinyov görüşü prezidentlərin bu il iyulun 18-də Moskvada keçirilmiş görüşünün davamı olacaq". Y.Merzlyakov vurğuladı ki, İ.Əliyev Moskva görüşünün nəticələrini çox pozitiv adlandırıb: "Prezident ümidvar olduğunu bildirdi ki, Kişinyov görüşü də Moskva görüşünün müsbət dinamikasını davam etdirəcək".
   
   Fransalı diplomat Bernar Fasye isə Dağlıq Qarabağın azərbaycanlı icması ilə keçirdikləri görüşə toxundu. O bu görüşdən razı qaldıqlarını söylədi: "İcmanın bütün üzvlərinin Dağlıq Qarabağ erməniləri ilə yenidən birgə yaşamağa hazır olduqlarını söyləməsini çox yüksək qiymətləndiririk". Amerikalı diplomat Robert Bradtkenin sözlərinə görə isə ABŞ Qarabağ münaqişəsinin sülh yolu ilə həll olunmasında vasitəçiliyi davam etdirməyə hazırdır: "Bu vaxta kimi danışıqlarda müəyyən tərəqqi əldə edilib.
   
   Çox ümid edirik ki, Kişinyov görüşündə daha çox irəliləyişə nail olunacaq". Daha sonra jurnalistlərin suallarını cavablandıran Y.Merzlyakov bildirib ki, həmsədrlər tərəflərə Kişinyovda imzalanması üçün heç bir sənəd təqdim etməyəcəklər.
   
   Mətbuat konfransından əvvəl isə, həmsədrlər Qarabağın azərbaycanlı icmasının rəhbərliyi ilə görüşüblər. Görüşdə Dağlıq Qarabağ münaqişəsinin nizamlanması prosesi müzakirə edilib, bölgənin Azərbaycan icmasının mövqeyi həmsədrlərin diqqətinə çatdırılıb. Bunun ardınca isə xarici işlər nazirinin müavini Araz Əzimovla görüş keçirilib.
   
   Görüşdən sonra jurnalistlərin suallarını cavablandıran Qarabağın azərbaycanlı icmasının rəhbəri Bayram Səfərov vurğuladı ki, həmsədrlərlə əsasən azərbaycanlı qaçqınların Qarabağa qayıtmasını müzakirə ediblər: "Ümid edirik ki, yaxın vaxtlarda bu məsələ mərhələli şəkildə həll ediləcək. Həmçinin Qarabağın azərbaycanlı və erməni icmalarının da görüşünün vaxtı dəqiqləşməyib". İcma rəhbəri vurğuladı ki, Qarabağ erməniləri ilə konkret məsələlərlə bağlı danışıqlar münaqişənin həllinə dair Azərbaycanla Ermənistan arasında protokollar imzalandıqdan sonra mümkündür. Məhz bunun ardınca icmalar bölgədə birgə yaşamaqla bağlı hər iki tərəfi razı salacaq detalları və nüansları müzakirə edəcəklər: "Azərbaycan çoxmillətli dövlətdir. Burada müxtəlif millətlər yaşayır. Qarabağ erməniləri də bu xalqlar kimi bizim dövlətdə normal yaşayıb inkişaf edə bilərlər".
   
   Həmsədrlərin yenə də pozitiv əhval-ruhiyyədə olmasına baxmayaraq, Kişinyov görüşü öncəsi İrəvan tərəfi yenə də təxribat xarakterli bəyanatlar səsləndirir. Ermənistanın xarici işlər naziri Edvard Nalbandyan "Frans-press"ə açıqlamasında bildirib ki, Dağlıq Qarabağ münaqişəsinin həlli ilə bağlı aparılan danışıqlarda irəliləyiş gözləmək lazım deyil: "Danışıqlar prosesi müəyyən vaxt tələb edir. Yaxın vaxtlarda prosesdə sıçrayışların olacağına dair proqnozların nəyə əsaslandığını mən bilmirəm".
   
   Həmsədrlərin bölgəyə səfərindən sonra Bakının Qarabağ münaqişəsi ilə bağlı mövqeyi isə bir daha xarici işlər nazirinin müavini Araz Əzimov tərəfindən səsləndirildi. Dünən jurnalistlərə açıqlamasında nazir müavini qeyd etdi ki, Bakının münaqişənin həlli ilə bağlı mövqeyi dəyişməz olaraq qalır. Dağlıq Qarabağ münaqişəsinin həlli regional nöqteyi-nəzərdən çox vacibdir. Belə ki, bütün kommunikasiyalar və yollar bağlıdır. Onun sözlərinə görə, həmsədrlər prezidentlərin Kişinyov görüşünü hazırlayırlar. Bəzi məsələlər bu görüşdə, digərləri isə danışıqların sonrakı mərhələsində müzakirə olunacaq: "Münaqişənin birtərəfli həlli yoxdur. O yalnız güzəşt əsasında nizamlana bilər. Azərbaycan problemin kompromis yolu ilə həllinə hazırdır. Qarabağa Azərbaycanın tərkibində yüksəksəviyyəli muxtariyyət verilməlidir. Ermənistan maksimalizmdən imtina etməlidir. Bu baş verməsə, münaqişənin konseptual həlli olmayacaq. Prinsiplərdən biri 7 rayonun qaytarılmasıdır. Lakin 7 rayonun qaytarılması münaqişənin həlli demək deyil. Qarabağ Azərbaycanın tərkibində qalmalı, qaçqınlar qayıtmalı, icmalar birgə yaşamalıdırlar". A.Əzimov onu da vurğuladı ki, yalnız bundan sonra status məsələsini həll etmək olar. Başqa bir məntiqsə yolverilməzdir. Azərbaycanın razılığı olmadan Ermənistan üçün münaqişənin həll variantı ola bilməz.
   
   

Dünən Azərbaycan İrana nota verib. "AzərTac". Xarici İşlər Nazirliyindən verilən məlumata görə, İranın Azərbaycandakı səfiri Məmmədbağır Bəhrami XİN-ə dəvət olunub və burada xarici işlər nazirinin müavini Vaqif Sadıqov tərəfindən qəbul edilən səfirə bildirilib ki, İranın rəsmi qurumu olan Radio və Televiziya Təşkilatının və bu təşkilata məxsus "Səhər" televiziya kanalının internet saytlarında oktyabrın 4-də Azərbaycan Respublikasının daxili və xarici siyasəti ilə bağlı video çarx və məqalə yerləşdirilib.
   
   Həmin materialda Azərbaycanın dövlət siyasəti məqsədyönlü şəkildə təhrif olunub, dövlətin milli rəmzi olan dövlət bayrağı kobudcasına təhqir edilib, həmçinin Azərbaycanın hökumət üzvləri, Milli Məclisinin deputatları və digər dövlət məmurlarına qarşı böhtan xarakterli ittihamlar yer alıb.
   
   V.Sadıqov belə qərəzli materialların İran KİV-də yayımlanmasının Azərbaycanda ciddi narahatlığa səbəb olduğunu bildirib, eyni xarakterli materialların İranın rəsmi mətbu orqanlarında əvvəllər də yer aldığını və bununla bağlı Azərbaycan tərəfinin dəfələrlə narahatılığını ifadə etdiyini xatırladib. O qeyd edib ki, son zamanlar Azərbaycana qarşı qərəzli veriliş və yazılarda təhqir və böhtanların sayı artaraq öz həddini aşıb.
   
   Nazir müavini belə halların iki ölkə arasındakı münasibətlərə ciddi xələl gətirə biləcəyini deyib, İranın rəsmi qurumlarının yolverilməz hərəkətlərinə Azərbaycan tərəfinin qəti etirazını bildirib, bu hərəkətlərin səbəblərinin araşdırılmasına və nəticələri barədə Azərbaycan tərəfinin məlumatlandırılmasına, həmçinin bu kimi halların qarşısının alınması və təkrar olunmaması istiqamətində İranın müvafiq addımlar atmasına israrla təkid edib.
   
   Sonra M.Bəhramiyə Azərbaycan Xarici İşlər Nazirliyinin eyni mövzulu rəsmi notası verilib. Diplomat görüş və müvafiq nota barədə İran tərəfini məlumatlandıracağını deyib.
   
   

Belarus, nəhayət, Kollektiv Təhlükəsizlik Müqaviləsi Təşkilatının (KTMT) kollektiv operativ reaksiya qüvvələrinə qoşulmaq qərarı verib. Xatırladaq ki, Moskvanın himayəsi ilə təşkilata üzv dövlətlərin birgə hərbi kontingentinin yaradılması qərara alınsa da, Minsk öz şərtlərini irəli sürərək sənədi imzalamayıb. "İnterfsaks"ın məlumatına görə, nəhayət, Aleksandr Lukaşenko bu haqda qərar qəbul edib. Belarus parlamentinin milli təhlükəsizlik komissiyasının rəhbəri Viktor Quminski bildirib ki, sözügedən qüvvələrin yaradılması Belarus Konstitusiyasının ölkə hərbçilərinin digər dövlətlərin ərazilərindəki münaqişələrdə iştirakına qoyduğu qadağaya zidd deyil. Xatırladaq ki, bu ilin iyununda Rusiya ilə Belarus arasında "süd müharibəsi"nin yaşandığı vaxt Lukaşenko KTMT-nin Moskvada keçirilən toplantısına qatılmaqdan imtina etmişdi və qurum üzvləri hərbi kontingentin yaradılmasına dair razılaşmanı Minskin iştirakı olmadan imzalamışdılar. Avqustun əvvəlində Lukaşenko blokun Qırğızıstanda keçirilən qeyri-formal sammitinə qatılsa da, yenə də sənədi imzalamaqdan imtina etmişdi. Yalnız bir müddət əvvəl o, rusiyalı həmkarı Dmitri Medvedyevlə görüşdə fikrini dəyişə biləcəyinə işarə edib və bu günlərdə iki ölkənin birgə hərbi təlimləri zamanı sənədə imza atacağını açıq şəkildə bildirib. KTMT-nin mətbuat katibi Vitali Struqoves isə artıq sənədin imzalanması məsələsinin "bir-iki həftənin işi olduğunu" bildirib və oradakı bütün məqamların tam razılaşdırıldığını söyləyib.

PREZİDENT İlham Əliyev Slovakiyanın Konstitusiya Məhkəməsinin sədri İvetta Matsejkovanı qəbul edib. "AzərTAcc"ın məlumatına görə, dövlət başçısı Azərbaycanla Slovakiya arasında münasibətlərin bütün istiqamətlərdə genişlənməsinin zəruri olduğunu qeyd edib.
   
   Qonaq isə ölkəsinin Konstitusiya Məhkəməsi ilə Azərbaycanın analoji qurumu arasında beynəlxalq səviyyədə uğurlu əməkdaşlığın həyata keçirilməsindən danışıb.

DÜnƏn prezident İlham Əliyev "Caspian Agro-2009" kənd təsərrüfatı və ərzaq məhsullarının istehsalı, emalı və qablaşdırılması beynəlxalq sərgisi ilə tanış olub. "AzərTAc"ın məlumatına görə, Heydər Əliyev adına İdman-Konsert Kompleksində təşkil olunmuş sərgiyə gələn dövlət başçısına məlumat verilib ki, tədbirin təşkilində əsas məqsəd Azərbaycanda istehsal olunan kənd təsərrüfatı və emal sənayesi məhsullarının nümayişi ilə yanaşı, bu sahələrin daha da inkişafına nail olmaq üçün xarici şirkətlərin, sərmayədarların diqqətini cəlb etməkdir.
   
   Qeyd edək ki, İ.Əliyevin təşəbbüsü və tapşırığı ilə keçirilən sərgidə Azərbaycanla yanaşı, ABŞ, Almaniya, Türkiyə, İtaliya, Belarus, Suriya, İsrail, Litva, Latviyanın 80-dən artıq şirkəti təmsil olunub.
   
   

Azərbaycan Prezidenti yanında Strateyi Araşdırmalar Mərkəzi tərəfindən "Nabucco" layihəsi hazırkı mərhələdə" mövzusunda təşkil olunan "dəyirmi masa"da çıxış edən Macarıstan hökumətinin "Nabucco" layihəsi ilə bağlı xüsusi tapşırıqlar üzrə səfiri Mixay Bayer layihənin maliyyələşdirilməsinin hazırda hansı mərhələdə olması və maliyyə qaynaqları ilə bağlı geniş təqdimat verib. O bildirib ki, Avropa öz istehlakçılarını zəruri miqdarda eneryi ilə təmin edə bilmədiyi və illik istehlakın 80%-ni başqa ölkələrdən idxal etdiyi üçün eneryi təchizatı mənbələrinin diversifikasiyasına ehtiyac duyur: "2017-ci ildə idxalın həcmi 93%-ə çata bilər. "Nabucco" layihəsi isə bu baxımdan bir nömrəli prioritetdir". M.Bayer bildirib ki, layihə siyasi deyil, kommersiya xarakterli olduğundan eneryidaşıyıcılarının Avropaya çatdırılması üçün digər regional layihələrə nəinki mane olmayacaq, əksinə, stimul verəcək. Onun sözlərinə görə, ilkin mərhələdə layihənin maliyyələşdirilməsi ilə bağlı problem yaranmayacaq. Artıq Avropa İnvestisiya Bankı, Beynəlxalq Maliyyə Korporasiyası, Avropa Yenidənqurma və İnkişaf Bankı layihəyə maraq göstəriblər və onun maliyyələşdirilməsində iştirak edəcəklər. Sonuncu "Nabuco" layihəsinin reallaşmasına 1 mlrd. avro ayıracağını bəyan edib. Türkiyə ilə münasibətləri normallaşacağı təqdirdə Ermənistanın layihədə iştirakının mümkünlüyü ilə bağlı sualı cavablandıran M.Bayer deyib ki, "Nabucco" layihəsinin konsepsiyası artıq formalaşdırılıb və dəyişdirilməyəcək. "Dəyirmi masa"da XİN-in və ADA-nın məsul əməkdaşları, Azərbaycanda akkreditə olunmuş diplomatik nümayəndəliklərin təmsilçiləri iştirak edib.
   
   

Qazaxıstanda səfərdə olan Fransa prezidenti Nikola Sarkozi bir sıra məsələlərlə yanaşı, Dağlıq Qarabağ münaqişəsi haqda da danışıb. Daha dəqiqi, Qafqazdakı situasiyadan danışan N.Sarkozi bildirib ki, Mərkəzi Asiyada vəziyyətin sabitləşməsi Qafqaz regionundakı münaqişələrin həllinə də müsbət təsir göstərə bilər. Qazaxıstanlı həmkarı Nursultan Nazarbayevlə görüşdən sonra keçirilən birgə mətbuat konfransında Fransa lideri deyib: "Qazaxıstan dinc, sülhə can atan ölkədir. Düşünürəm ki, bu, region ölkələri arasında sülhün bərpa olunmasına, bir sıra münaqişələrin, məsələn, Dağlıq Qarabağ, Osetiya və Abxaziya problemlərinin həllinə köməklik göstərə bilər".
   
   N.Sarkozinin fikrincə, regionda sabitliyin bərpası məhz Qazaxıstanın üzərinə düşür. O bildirib ki, Qazaxıstan Əfqanıstan və İranda böhranın nizamlanmasında, Rusiya ilə yeni münasibətlərin qurulmasında, dözümsüzlük və ekstremizmlə mübarizədə Qərbə lazımlı ölkədir. "Bu regionda böhranlı vəziyyətlərin həllində, Dağlıq Qarabağ, Osetiya və Abxaziya münaqişələrinin həllində də Qazaxıstana ehtiyac var", - deyə Fransanın dövlət başçısı qeyd edib. Dünən Dağlıq Qarabağ münaqişəsi daha bir görüşdə diqqət mərkəzində olub. Rusiya Xarici İşlər Nazirliyinin saytında yer almış məlumata görə, ölkənin xarici siyasət idarəsi rəhbərinin müavini Qriqori Karasi və Rusiya Təhlükəsizlik Şurasının katibi Yuri Zubakov Moskvada Avropa Birliyi Şurasının baş katibliyinin siyasi şöbəsinin rəhbəri Helqa Şmidtlə görüşdə Dağlıq Qarabağ problemindən də söz açıblar. Görüşdə Moskvada vəziyyətlə yanaşı, Dnestryanı münaqişə və Dağlıq Qarabağ problemi diqqət mərkəzində olub. Tərəflər ümumilikdə Cənubi Qafqazdakı durum haqda da danışıblar.
   
   

ABŞ prezidenti Barak Obama Ermənistanın dövlət başçısı Serj Sarkisyan ilə telefon əlaqəsi yaradaraq İrəvan - Ankara münasibətlərini müzakirə edib. "Novosti-Armeniya" agentliyinin məlumatına görə, telefon danışığı S.Sarkisyanın Los-Anceles səfəri zamanı Ağ Ev sahibinin təşəbbüsü ilə baş tutub. Vaşinqtonun məsələyə dair mövqeyini bir daha açıqlayan B.Obama bildirib ki, Ermənistan - Türkiyə yaxınlaşması hər hansı şərt irəli sürülmədən baş verməlidir. O bunun Dağlıq Qarabağ münaqişəsinin həlli ilə əlaqələndirilməməsinin vacibliyini qeyd edib.
   
   S.Sarkisyan öz növbəsində ATƏT-in Minsk Qrupu çərçivəsində ABŞ-ın gördüyü işlərə görə B.Obamaya minnətdarlıq edib. Erməni prezident iddia edib ki, problemin həllində əsas mərhələ "Dağlıq Qarabağ xalqının referendum yolu ilə öz hüquqi statusuna dair verəcəyi qərar olacaq". O bu məsələnin Madrid prinsiplərində də əksini tapdığını söyləyib.
   
   "İnterfaks" xəbər verir ki, B.Obama indiyədək işlətmədiyi "erməni soyqırımı" ifadəsini də dilə gətirib. Məlumata görə, erməni diasporunun Ermənistanla Türkiyə arasında münasibətlərin normallaşdırılmasını nəzərdə tutan protokola etirazını təbii adlandıran Birləşmiş Ştatların rəhbəri bunu təbii adlandırıb və fikrini "erməni xalqının Osmanlı Türkiyəsi tərəfindən soyqırıma məruz qalması" ilə əsaslandırıb.
   
   

Azərbaycan müstəqillik qazandığı gündən Qəbələ RLS-in gələcək aqibəti bütün ölkələrin siyasi dairələrində düşünülür. Niyə? Ona görə ki, əsasən bütövlükdə Yaxın və Orta Şərqi nəzarətdə saxlayan bu obyekt adıçəkilən bölgə ilə yanaşı, NATO-nun üzvü olan Türkiyəni, Şərqi Avropanı, Rusiyanın özünü və yanacaq resursları ilə zəngin Mərkəzi Asiyanı əldə saxlamaq üçün çox vacibdir.
   
   
   
   Yeri gəlmişkən, Avropa və Amerikanın siyasi xadimləri Qafqazın özünü dünyanın hərbi-siyasi düzəninə təsir göstərən bölgə adlandırırlar.
   
   Pentaqon yenidən bəyan edib ki, Rusiyanın Azərbaycan ərazisində yerləşən Qəbələ RLS-dən və Armavirdəki eyni təyinatlı stansiyadan birgə istifadənin mümkünlüyünü araşdırır. Bu məlumatı "İnterfaks"a ABŞ müdafiə nazirinin müavini Aleksandr Verşbou deyib. Rusiya paytaxtında məsləhətləşmə aparan A.Verşbou deyib ki, raket hücumu ehtimalından qaynaqlanan ümumi təhlükə qarşısında informasiya mübadiləsi aparmaq mümkündür: "Bu, raket hücumundan müdafiə sahəsində NATO ilə Rusiya, yaxud ABŞ-la Rusiya arasında əməkdaşlığın başlanğıcı ola bilər".
   
   Maraqlıdır, Vaşinqton dəfələrlə səslənən fikirləri bu gün yenidən təkrarlamaqla hansı məqsədi güdür?
   
   Hərbi ekspert Yaşar Cəfərlinin fikrincə, Hind okeanınadək geniş ərazini nəzarətdə saxlayan Qəbələ RLS kimi vacib obyektin diqqətdə saxlanması təbidir: "Putin Rusiyada prezident olarkən Birləşmiş Ştatlara təklif etmişdi ki, Şərqi Avropada raketdən müdafiə qurğuları yerləşdirməkdənsə, Qəbələ RLS-dən birgə istifadə etmək imkanlarını araşdırsınlar. Yəni Putin bu yolla Rusiyanın Qərb sərhədlərində güvənliyi artırmaq, əvəzində cənub qapılarının - Qafqazın təhlükəsizliyini təmin etmək məqsədi güdür. Amma amerikalılar hələlik konkret cavab vermirlər və bu səbəbdən də vaxtaşırı bu məsələni ortaya atırlar". RLS-in fəaliyyəti iqtisadi-maddi və hərbi təhlükəsizlik baxımından Azərbaycana nə verir? Yeri gəlmişkən, neçə illərdir bir sıra yerli və xarici mütəxəssislər adıçəkilən stansiyanın bölgəni yüksək dərəcədə şüalandırdığına dair (xərçəng, ürəktutma və s. xəstəliklərin yayılması, nar kimi subtropik meyvələrin qısa vaxtda çürüməsi - V.T.) çıxışlar edirlər. Təbii ki, Rusiya həmin obyekti işlətməklə Azərbaycana ildə 7 milyon dollar həcmində icarə haqqı ödəyir. Amma bu vəsait dəyən ziyanı ödəyirmi? Y.Cəfərli hərbçi olsa da, bu kimi məsələlərə şərh vermək istəmədi. Onun fikrincə, Qəbələ RLS Rusiyaya icarəyə verilərkən güman ki, bu kimi məsələlər öyrənilib-düşünülüb. Yəni ziyanı xeyrindən çox olsaydı, hökumət sazişə imza atmazdı: "O ki qaldı siyasi tərəflərinə, əgər Rusiya və ABŞ kimi superdövlətlər Azərbaycan ərazisində yerləşən hansısa obyektlə bağlı razılığa gəlirlərsə, bu ancaq bizim ölkənin xeyrinədir. Yəni Azərbaycan həm bu iki böyük dövlətin razılağa gəlməsində əlaqələndirici olar, həm də bir sıra problemlərinin həllində adıçəkilən ölkələrdən dəstək alar. O cümlədən işğal olunmuş ərazilərin geri qaytarılması məsələsində güzəştlər əldə edər".
   
   Bir faktı da xatırladaq ki, Qəbələ RLS çoxlarının düşündüyündən fərqli olaraq hansısa təhlükəni məhvetmə funksiyasını daşımır. Obyekt yalnız islam şərqinin hava məkanını nəzarətdə saxlayır. Əgər belə bir təhlükə mövcuddursa, RLS məlumatı mərkəzə ötürür və başqa bir obyekt məhvetmə əməliyyatını həyata keçirir. O zaman Qəbələ RLS-in Azərbaycanın təhlükəsizliyi məsələsində rolu nədən ibarət ola bilər? Y.Cəfərlinin fikrincə, həmin obyektin birbaşa Bakının sərəncamına verilməsinin Azərbaycana nə xeyri var, nə də ziyanı: "Qəbələ RLS elə qurulub ki, onun buraxdığı radiodalğalar Azərbaycan da daxil olmaqla keçmiş SSRİ ərazisini tutmur. Yəni Ermənistanla Gürcüstan nəzarətdən kənar qalır. Türkiyə və ya ərəb ölkələrindən isə bizi hər hansı təhlükə gözləmir. Eyni zamanda Azərbaycanın Hind okeanı sahillərində təyyarələrin hərəkətini izləməyə maraqlı olduğunu da düşünmürəm. Hələ bu obyektin saxlanması və işləməsi üçün çəkiləcək xərcləri demirəm". Y.Cəfərli sonda onu da vurğuladı ki, adıçəkilən RLS ya ABŞ-la Rusiyanın birgə nəzarətində olacaq, ya da Moskva əvvəlki kimi təkbaşına idarə edəcək. Yəni Rusiya bütün hallarda ondan əl çəkməyəcək.
   
   

DÜnƏn Bakıda marşrut avtobusunun qəzaya uğraması nəticəsində bir neçə nəfər xəsarət alıb. "ANS-press" Sabunçu rayon Polis İdarəsinə istinadən xəbər verir ki, qəza avtobusun sürücüsünün idarəetməni itirməsi üzündən baş verib. Nəticədə Sabunçu dairəsindəki körpünün üstü ilə hərəkət edən 319 saylı xətt avtobusu körpüdən aşıb. Bu zaman 7 sərnişin müxtəlif dərəcəli bədən xəsarətləri alaraq xəstəxanaya yerləşdirilib. Onlar 28 yaşlı Rent İsmayılov, 20 yaşlı Rahib Qəhrəmanov, 54 yaşlı Ədilə Məmmədova, 20 yaşlı Anar Nəzərov, 33 yaşlı Ağasəf Cəfərov, 57 yaşlı Yusif Qocalıyev və 60 yaşlı Sabir Qasımovdur.
   
   Faktla bağlı araşdırma aparılır.

BeynƏlxalq Valyuta Fondunun dünyadakı iqtisadi vəziyyətlə bağlı son hesabatında verdiyi proqnozlara görə, 2010-cu ildə MDB-də ən kəskin geriləmə Ermənistanda (15,6 faiz) və Ukraynada (14 faiz) qeydə alınacaq. BVF-nin saytından əldə etdiyimiz məlumata görə, siyahıda daha sonra Rusiya (7,5 faiz), Gürcüstan (4 faiz), Qazaxıstan (2 faiz) gəlir. Bununla belə, Tacikistan, Özbəkistan, Türkmənistan və Qırğızıstanda iqtisadi artım proqnozlaşdırılır.
   
   BVF-nin proqnozuna görə, 2010-cu ildə Azərbaycanda ÜDM istehsalı 7,4 faiz artacaq. ÜDM artımının Özbəkistanda 7 faiz, Qırğızıstan və Tacikistanda 3 faiz, Ukraynada 2,7 faiz, Qazaxıstan və Gürcüstanda 2 faiz, Belarusda 1,8 faiz, Rusiyada 1,5 faiz, Ermənistanda isə 1,2 faiz olacağı proqnozlaşdırılır.
   
   

ÖlkƏmizdƏ səfərdə olan Slovakiyanın Konstitusiya Məhkəməsinin sədri İvetta Matseykovanın başçılıq etdiyi nümayəndə heyəti dünən ədliyyə naziri, Məhkəmə-Hüquq Şurasının sədri Fikrət Məmmədovla görüşüb. Ədliyyə Nazirliyinin mətbuat xidmətindən "Həftə içi"nə bildiriblər ki, dövlətlərimiz arasında dostluq və əməkdaşlıq münasibətlərinin uğurlu inkişafını qeyd edən nazir bu ilin mayında Slovakiya baş nazirinin müavini, ədliyyə naziri Ştefan Harabinin Azərbaycana səfərini və iki ölkənin ədliyyə nazirlikləri arasında imzalanmış memorandumun əhəmiyyətini vurğulamış, hüquq sahəsində əməkdaşlığın daha da möhkəmlənəcəyinə ümidvar olduğunu söyləyib. Xanım İ.Matseykova Slovakiyanın Azərbaycanla əlaqələrin genişlənməsinə mühüm önəm verdiyini vurğulayıb, respublikamızda aparılan mütərəqqi məhkəmə-hüquq islahatlarının müsbət nəticələrini təqdir edərək ölkəsinin məhkəmə sistemi barədə məlumat verib.