Ukraynada Regionlar Partiyasının sədri Viktor Yanukoviçin prezident seçilməsindən sonra bölgədə geosiyasi baxımdan ümumi vəziyyətə dair müxtəlif fikirlər səsləndirilir. Bəzi ekspertlər bu amilin Qərb dövlətlərinin postsovet məkanındakı planlarının əhəmiyyətli dərəcədə zəifləyəcəyini, MDB-nin isə dirçələcəyini söyləyirlər. Artıq Yanukoviçin xarici siyasət kursunda Rusiyaya doğru istiqamətlənəcəyi onun fəaliyyətində də təsdiqini tapıb. Qeyd edək ki, Ukrayna Azərbaycanın ən yaxın strateji tərəfdaşlarından sayılır.
   
   GUAM çərçivəsində Bakı və Kiyevin müxtəlif məsələlərlə bağlı mövqeləri tamamilə üst-üstə düşür. Lakin Ukraynanın yeni rəhbərliyi bu birliyə qarşı çıxdığını artıq səsləndirib. Bütün qeyd olunan məsələlərlə bağlı suallarımızı isə MDB Dövlətləri İnstitutunun Ukrayna filialının rəhbəri, ekspert Vladimir Kornilov cavablandırır:
   
   - Azərbaycan və Ukrayna arasındakı münasibətləri Viktor Yuşşenkonun hakimiyyəti illərində o qədər də konstruktiv adlandırmaq olmazdı. Bu münasibətlər əsasən perspektivi olmayan GUAM formatında qurulurdu. Həm də Yuşşenkonun hakimiyyəti illərində Kiyev və Tbilisi Bakını istənilən yolla Rusiyadan yan keçən neft-qaz kəmərlərinin tikintisi kimi avantürist layihələrə cəlb etmək istəyirdilər.
   
   -Yanukoviçin prezident seçilməsinin ardından Ukraynanın Azərbaycana münasibətdə xarici siyasət kursunda hansısa dəyişikliklər baş verəcək?
   
   - Fikrimcə, ölkəyə yeni prezidentin gəlişi ilə tezliklə Ukraynanın yeni xarici işlər nazirinin adı da məlum olacaq. Kiyev Bakı ilə ikitərəfli dialoqları bərpa etmək üçün çalışacaq. Lakin bu dəfə GUAM və Gürcüstan prezidenti Mixail Saakaşvilinin xidmətlərindən istifadə edilməyəcək. Hamı anlayır ki, Ukraynanın yeni xarici siyasətinin əsasında ilk yeri Rusiya ilə münasibətlərin normallaşdırılması tutur. Kiyevin ilk səyləri məhz Moskva ilə tərəfdaşlıq, dostluq münasibətlərinin normallaşdırılmasına istiqamətlənəcək. Rəsmi Kiyev bu məsələdə əlindən gələni və ondan asılı olan hər şeyi edəcək ki, Moskvaya Yuşşenkonun hakimiyyəti illərində əsası qoyulan antirusiya siyasətinin hələ də davam etdirilməsi ilə bağlı iddialar səsləndirməsi üçün bəhanələr verməsin.
   
   - Ukraynanın yeni prezidenti dövlət başçısı seçilməzdən əvvəl GUAM-ın perspektivlərinə inanmadığını söylədi. Bu barədə nə düşünürsünüz?
   
   - Kiyev keçmiş SSRİ dövlətlərinə və postsovet məkanındakı müxtəlif inteqrasiya layihələrinə münasibətdə bütün addımlarını və fəaliyyətini Rusiya ilə əlaqələrin normallaşdırılması ilə razılaşdırmağa çalışacaq. Əgər tərəzinin bir gözündə hansısa respublika ilə əməkdaşlıqdan ani olaraq bir neçə milyon dollarlıq gəlir gətirən məqam, digər gözündə isə Rusiya ilə əməkdaşlıqdan gələcək çoxmilyardlı mənfəət dayansa, Yanukoviçin tərəzinin hansı gözünü seçəcəyi aydındır. Fikrimcə, Azərbaycan, Moldova və Ukrayna heç bir həyati əhəmiyyət daşımayan GUAM-ı qoruyub-saxlamaq bahasına Rusiya ilə dostluq münasibətlərini riskə almağa dəyib-dəymədiyini götür-qoy etməlidir. Əgər bu təşkilatda yalnız "G" qalsa, Tbilisidən başqa heç kim inciməyəcək.
   
   - Yanukoviçin prezidentliyi dönəmində Dağlıq Qarabağ münaqişəsinin həlli ilə bağlı Ukraynanın mövqeyində hansısa dəyişikliklərin baş verməsi mümkündür?
   
   - Yanukoviçin yaxın vaxtlarda Abxaziya, Dnestryanı, Cənubi Osetiya və Dağlıq Qarabağ münaqişəsi kimi kəskin və birmənalı olmayan məsələlərdən uzaq duracağını düşünürəm. Ukrayna prezidentinin bu yaxınlarda "Euronews" kanalına müsahibəsində Cənubi Qafqaz münaqişələri ilə bağlı səsləndirdiyi fikirlər də bu ehtimalı bir daha təsdiqləyir.
   
   - Artıq Ukraynada dediyiniz kimi, Rusiyaya daha çox meyl edən bir siyasətçi dövlət başçısı vəzifəsini tutub. Bu amil MDB-nin gələcəyinə hansı təsiri göstərəcək?
   
   - Ümid edirəm, Yanukoviçin hakimiyyətə gəlişindən və Ukraynanın xarici siyasət kursunda ciddi dəyişikliklərdən sonra MDB çərçivəsində inteqrasiya prosesləri sürətlənəcək. Əgər Ukraynada baş nazir postuna "Vahid iqtisadi məkan" ideyasının əsas təşəbbüskarlarından olan Nikolay Azarov təsdiqlənsə, bu layihə də mütləq həyata keçirilməyə başlayacaq. Məlumdur ki, MDB çərçivəsində bir neçə effektli işləyən və mənfəət verməyə başlayan iqtisadi layihələr reallaşsa, bu, təşkilatın siyasi və ideoloji anlamda bütün layihələrinə yeni impuls verəcək. Ukraynanın bu layihələrdə rolu həlledici ola bilər.