DÜNƏN Siyəzən rayonunda 5 il əvvəl törədilən qətlin üstü açılıb. DİN-in mətbuat xidmətindən "Həftə içi"nə verilən məlumata görə, qətl hadisəsi 2005-ci il dekabrın 28-də Qara Siyəzən kəndi ərazisində baş verib. Cinayət hadisəsinin üstünü açmaqda Siyəzən rayon hüquq-mühafizə orqanlarının əməkdaşlarına Mahmudovlar ailəsinin gəlini kömək edib. Məlumata görə, qətlə yetirilən 24 yaşlı Dilgüşə Mahmudova əxlaqsızlıqla məşğul olub. Belə ki, nişanlı olmasına baxmayaraq, başqa bir kişi ilə qeyri-qanuni bir yerdə yaşayıb. Bundan sonra nişanı qaytarılan D.Mahmudovadan ailə üzvləri üz döndəriblər. 24 yaşlı qız bir müddət Naftalandakı bacısının evində yaşayıb, lakin yenə də əməlindən geri qalmayıb. Bacısının davranışından razı qalmayan böyük bacı onu Naxçıvanda yaşayan qardaşının yanına göndərib. Amma qardaşı da bacısının davranışlarına dözə bilməyib. Geri qayıdan D.Mahmudovanı Bakıda 1945-ci il təvəllüdlü atası Vaqif Mahmudov qarşılayıb. Ata qızını Qara Siyəzən kəndindəki atası Əlisoltana məxsus evə aparıb. Qızın əl-qolunu bağlayan ata onu boğaraq öldürüb. Meyidi isə həyətdəki ayaqyolu quyusuna atıb. Polis əməkdaşları tərəfindən saxlanılan V.Mahmudov ifadəsində hadisəni törətdiyini bildirib. Hazırda faktla bağlı CM-in 120.1-ci (qəsdən adamöldürmə) maddəsi ilə cinayət işi qaldırılıb.