Finlandiyalı alimlər təkamülün maraqlı cəhətini üzə çıxarıblar. Onlar müəyyən ediblər ki, təkamül prosesi nəticəsində qadınlar getdikcə daha da gözəlləşirsə, kişilər olduğu kimi qalırlar. "Sunday Times"in yazdığına görə, Finlandiyanın Helsinki universitetinin alimlərinin hesablaması zamanı gözəl qadınların adi xanımlarla müqayisədə dünyaya 16 faiz daha çox övlad gətirdikləri də bəlli olub. Üstəlik, uşaqları əksər vaxt qız olur. Bu 16 faizlik fərqi alimlər gözəl xanımların özlərinə sevgili tapmaqda çətinlik çəkməməsi, daha asanlıqla ailə qura və xoşbəxt yaşaya bilməsi ilə əsaslandırır.
   
   Kişilərə gəlincə, qezet yazır ki, "onlar ibtidai dövrdə mağaradan necə çıxıblarsa, elə də qalıblar". "Lakin kişinin gözəlliyi qadınlar üçün o qədər də vacib deyil. Onlar bu eybəcərliklərini maddiyyatla kompensasiya edirlər", - deyə "Sunday Times" bildirir.

Britaniyalı alimlərin araşdırması BMT-nin iqlim dəyişiklikləri üzrə hökumətlərarası ekspertlər qrupunun proqnozunu təsdiqləyib. Xatırladaq ki, komissiya 2007-ci ildə bildirmişdi ki, 2100-cü ilədək atmosferdəki zərərli qazların miqdarı azalmasa, havanın temperaturu 1,1 - 6,4 dərəcə artacaq ki, bu da Dünya okeanının səviyyəsinin 18 - 59 santimetr yüksəlməsinə səbəb olacaq.
   
   Britaniyalı alimlər müəyyənləşdiriblər ki, havanın hərarəti həqiqətən də 1,1 - 6,4 dərəcə artarsa, okeanın səviyyəsi 82 santimetr yüksələcək. Onlar bildirir ki, okean suyunun səviyyəsi cəmi 50 santimetr yüksələrsə, bu, ciddi problemlər yaradacaq. Nəticədə 100 ildə bir dəfə daşqınların yaşandığı yerlərdə belə hallar hər 10 ildən bir yaşanacaq.

Almaniyanın Ravensburq şəhərindəki müqəddəs Yelizaveta klinikasının cərrahlarının keçirdiyi əməliyyat mütəxəssislərin marağına səbəb olub. "AMİ-TASS" xəbər verir ki, pasiyentin qarın boşluğundan çıxarılmış şişin çəkisi düz 12 kiloqramdır. Bu, klinikada indiyədək rast gəlinməmiş haldır. Həkimlər bildirir ki, onlar indiyədək çəkisi 2,5 kiloqramdan artıq olan şişə rast gəlməyiblər.
   
   Əməliyyat uğurlu keçib və xəstə özünü yaxşı hiss edir. Bununla yanaşı, əməliyyatadək 67 kiloqram çəkisi olan pasiyent indi 55 kiloqramdır.

ABŞ-ın Florida ştatının 65 yaşlı sakini Devid Qraunds sevimli iti "Mendi"yə görə həyatını risqə atıb. İtini gəzintiyə çıxaran Devid bir anlıq fikri yayındıqdan sonra "Mendi"nin yox olduğunu görüb. "İnternovosti.ru" saytının məlumatına görə, kolluqların arasında itini axtaran Devid təxminən 2 metr uzunluğunda timsahın "Mendi"ni udmaq üzrə olduğunu görüb. Heç nədən qorxmayan amerikalı yırtıcının üzərinə atılıb və mübarizəyə başlayıb. O, timsahın hər iki gözünü çıxarıb, daha sonra isə ağzını cırıb. Nəticədə "Mendi"ni xilas edən Devid iki barmağını itirməli olub.

İtaliyanın baş naziri Silvio Berluskoni ilə adı hallanan və son dönəmlərdə mətbuatın gündəmindən düşməyən itialiyalı fahişə Patrisiya d"Addario hökmət başçısı haqda daha bir ifşaedici açıqlama verib. "The Times"in yazdığına görə, gözəlçə bildirib ki, Berluskoni onunla keçirdiyi gecədən sonra Patrisiyaya Avropa Parlamentində yer boyun olub. Gözəlçə onu da bildirib ki, Berluskoni ilə onların ilk görüşü baş nazirin iqamətgahında olub və həmin vaxt orada hökumət başçısının dostu ilə yanaşı, daha 20 gənc qız olub. Patrisiyanın sözlərinə görə, Berluskoni ona 1 gecəyə görə 1000 avro söz versə də, sonradan bu pulu ödəməyib.

Bu günlərdə pop musiqisinin mərhum kralı Maykl Ceksonun 25 yaşlı oğlunun olduğuna dair məlumatlar dünya mətbuatının gündəmini zəbt edib. Məlumata görə, guya, bu, Ceksonun dəfnində də iştirak etmiş 25 yaşlı norveçli rəqqas Amer Bxattidir. Lakin dünən bu haqda ilk informasiyanı yaymış mənbələr "Sunday Mirror"a istinadən deyilənləri təkzib edib. Qəzetin yazdığına görə, Bxatti həqiqətən də deyildiyi kimi, bir müddət Ceksonun villasında qalıb, onunla birlikdə yaşayıb. Lakin o, müğənninin oğlu yox, yaxın dostu imiş.

Hindistanın Mumbay şəhərində sahilyanı ərazidə yaşayan 200-dən artıq insan evakuasiya edilib. Hökumət məktəblər və universitetləri bağlamağı tövsiyə edib, valideynləri uşaqlarını küçəyə buraxmamağa çağırıb. "Daily Mail"in yazdığına görə, buna səbəb şəhəri son 100 ilin ən güclü dalğasının vuracağı ilə bağlı informasiyanın əldə edilməsidir. Son bir neçə gündə artıq hündürlüyü təxminən 4,85 metr olan dalğalar Mubaya "hücum" çəkib. Yaxın günlərdə isə 5 metrdən artıq hündürlüyə malik dalğanın şəhərə "çırpılacağı" bildirilir.