ATƏT-in Minsk Qrupunun həmsədrləri Bernar Fasye, Yuri Merzlyakov və Metyu Brayza Krakovda Madrid prinsipləri ilə bağlı açıqlanmış sənədin Dağlıq Qarabağ münaqişəsinin əsası kimi işlənilməsi ilə bağlı növbəti işçi görüşlərini keçiriblər. "İnterfaks"ın məlumatına görə, fransalı həmsədr Bernar Fasye sənədin hələ tam hazır olmadığını vurğulayıb. Onun sözlərinə görə, həmsədrlər daha mükəmməl sənəd hazırlamaq üçün hələ bir neçə işçi görüş keçirəcəklər: "Biz Krakovda Madrid prinsiplərinin açıqlanması ilə bağlı sənədi həmsədr ölkələrin prezidentlərinin iyulun 10-da verdikləri birgə bəyanata uyğunlaşdırılması istiqamətində işləmişik.
   
   "...Sadəcə, işçi müzakirələr aparmışıq. Ona görə də görüşün sonunda hansısa birgə bəyanat vermədik. Çünki bu cür görüşlər adi işdir". Fransalı diplomat onu da vurğulayıb ki, həmsədrlər növbəti görüşün harda və nə vaxt keçiriləcəyini hələlik dəqiqləşdirməyiblər. Lakin amerikalı diplomat Metyu Brayza avqustda özünün həmkarları adından da bölgəyə səfər edəcək. Bernar Fasye isə sentyabrda gələcək. Hər 3 həmsədrin bölgəyə birgə səfərləri isə sentyabrın sonlarında olacaq: "Bizim bölgəyə bütün səfərlərimiz tərəflər arasında dialoqun inkişafına, mövqelərin yaxınlaşdırılmasına istiqamətlənib. Açıqlanmış sənəd tərəflərə tam hazır olduqdan sonra təqdim ediləcək".
   
   

"Ermənistan prezidenti Serj Sarkisyanın Türkiyəyə səfəri zamanı Axtamar erməni kilsəsini təmir edib orada xaç qoymaq istəyirik. Çünki islam dinində bütün dinlərə hörmətlə yanaşılır" - bu fikirləri Türkiyənin dövlət naziri Egemən Baxış səsləndirib.
   
   "Hürriyyət"in məlumatına görə, dövlət naziri Avropada məscidlərin açılmasına heç bir qadağa qoyulmadığını söyləyib. Bu səbəbdən də Türkiyədə də belə bir qadağanın olması məqsədəuyğun deyil: "Həmçinin biz bu kilsəni açsaq, ora bütün dövlətlərdən erməni dindarların axını olacaq. Biz isə sözügedən bölgədə turizmin inkişafına nail ola biləcəyik. Ümumiyyətlə, sərhədlərin bağlı qalması kommunizmin siyasətinin bəhrəsidir. Stalin həmişə sərhədləri bağlı saxlamağı xoşlayırdı. Nə üçün biz onun qaydası ilə getməliyik? Yunanlara, kürdlərə, ermənilərə "pisdir" deyirik. Nə vaxtadək düşmən qalmalıyıq? Buna nə vaxtsa son qoyulmalıdır".
   
   Bu arada Türkiyə mətbuatı yenidən Ermənistanla sərhədlərin açılması məsələsini gündəmə gətirib. "Son zamanlar Ermənistan - Türkiyə münasibətlərinin normallaşdırılması ilə bağlı danışıqların bərpası Dağlıq Qarabağ münaqişəsinin dalandan çıxmasına şərait yarada bilər" - bu fikirləri isə "Hadson" İnstitutunun vitse-prezidenti Endryus Bimbaşa "Todays zaman"a açıqlamasında səsləndirib.
   
   Onun sözlərinə görə, sərhədlərin açılması Azərbaycanla sürətli və normal diplomatik gedişlərin aparılmasını tələb edəcək. Əgər bu baş versə, Azərbaycanla Türkiyənin hər ikisi qazanacaq: "Azərbaycan sərhədlərin açılmasına qarşı çıxmaqla Ermənistanı iqtisadi gücdən məhrum etmək istəyir. Bununla da Dağlıq Qarabağ münaqişəsinin həllini yüngülləşdirməyə çalışır. Rusiya isə bölgənin aparıcı dövləti kimi özünün təsirinin qorunub-saxlanmasını istəyir. Çünki bölgə keçmiş SSRİ-nin bir hissəsidir. Buna görə də ittifaq dağılandan Rusiya bölgədəki dövlətləri Abxaziya, Cənubi Osetiya və Dağlıq Qarabağ kimi dondurulmuş münaqişələr vasitəsilə əlində saxlamağa çalışır. Azərbaycanın sənaye və hərbi baxımdan inkişafına baxmayaraq, Rusiya bu ölkədəki iqtisadi təzyiq vasitələri ilə öz siyasətini yürütməkdə davam edir".
   
   Rusiya və Avrasiya məsələləri üzrə Strateji və Beynəlxalq Araşdırmalar Mərkəzinin direktoru Endryu Kaçins isə "Todays zaman"a açıqlamasında vurğulayıb ki, Moskva 15 ildən artıqdır özünün maraqlarının təminini "dondurulmuş münaqişələr"in həllindəki status-kvonun saxlanılmasında görüb: "Biz keçən yay bu münaqişələrdən ikisinin Moskvanın xeyrinə necə həll edildiyini gördük. Mən Moskvanın Rusiyanın Azərbaycan və Ermənistana münasibətdə təzyiq vasitələrini azaldacaq Dağlıq Qarabağ münaqişəsinin istənilən həll variantını dəstəkləyəcəyinə şübhə edirəm. Bununla yanaşı, erməni - türk münasibətlərinin normallaşdırılmasına Ermənistanı Rusiyanın təsirindən, Dağlıq Qarabağ münaqişəsini isə dalandan çıxarmaq, bölgəyə sülh və sabitliyin gətirilməsi üçün yaxşı şans kimi yanaşmaq lazımdır". Ekspert Rusiyanın sərhədlərin açılmasını normal olaraq dəstəkləməyəcəyi qənaətindədir. Bunu isə Moskvanın İrəvana təzyiqinin azalacağı ehtimalının böyüklüyü ilə əsaslandırıb.
   
   

PREZİDENT İlham Əliyev Qırğızıstan və İndoneziyanın prezidentləri Kurmanbek Bakıyev və Susilo Bambanq Yudhoyonoya dövlət başçıları seçilmələri münasibətilə təbrik məktubları göndərib. Prezident hər iki məktubda dövlətlərarası əlaqələrin bundan sonra da uğurla inkişaf edəcəyinə əminliyini bildirib.
   
   

ErmƏnistan Silahlı Qüvvələrinin bölmələri iyulun 26-da saat 12:45-dən 12:47-dək Xocavənd rayonu ərazisindəki adsız yüksəkliklərdə yerləşən mövqelərdən, saat 13:10-dan 13:30-dək Tərtər rayonunun Göyarx kəndi yaxınlığında yerləşən mövqelərdən Azərbaycan Silahlı Qüvvələrinin üzbəüz mövqelərini avtomat və pulemyotlardan atəşə tutublar. Bu barədə "Trend"ə Müdafiə Nazirliyinin mətbuat xidmətindən məlumat verilib. Bütün hallarda düşmən cavab atəşi ilə susdurulub. İtki yoxdur.

Keçən həftə Azərbaycanın dilçi alimləri arasında yenidən ortaq türk dilinin seçilməsi ilə bağlı fikir ayrılıqları özünü büruzə verdi. Bir çoxları ortaq ünsiyyət vasitəsinin Türkiyə türkcəsi olmasını istəsələr də, başqaları Azərbaycan dilinin seçilməsinin vacibliyini önə çəkdilər.
   
   
   
   Hər iki tərəf də öz fikirlərini əsaslandırmağa çalışdı. Bu məsələ ilə bağlı "Həftə içi"nin suallarını millət vəkili, filologiya elmləri doktoru Nizami Cəfərov cavablandırır:
   
   - Bu gün uyğurları, cənubi azərbaycanlıları, Türkiyə türklərini çıxmaq şərtilə ortaq dil funksiyasını rus dili yerinə yetirir. Lakin biz rus dilinin də nüfuzunun tədricən aşağı düşdüyünü görürük. Ona görə də milli hissimiz bizi ortaq dil kimi öz xalqlarımızdan birinin dilini seçməyə vadar edir. Ancaq biz rus dilindən də birdəfəlik imtina edə bilmərik. Buna baxmayaraq, ikinci bir dil kimi Türkiyə türkcəsini götürürük. Çünki türk dilləri içərisində Türkiyə türkcəsi ən çox inkişaf edənidir. Vaxtilə böyük imperiyaların dövlət dili olub. Bu gün də türk dövlətlərinin əlaqələri kifayət qədər siyasi mahiyyət daşıyır. Dövlət dili olmuş türk dili ortaqlıq funksiyasını yerinə yetirə bilər. Digər tərəfdən, dünyada türk xalqları arasında ən çox yayılanı da Türkiyə türkləridir. Bu da istər-istəməz öz rolunu oynayır. Türkiyə dövləti də türk cümhuriyyətləri arasında ən çox inkişaf etmişidir. Bütün bu şərtlər ortaq dil məsələsində Türkiyə türkcəsinə üstünlük verməyi tələb edir. Bunun bir üstünlüyü də Türkiyə türkcəsinin türk xalqları arasında geniş yayılmasıdır. Artıq 15 ildir bu proses kifayət qədər sürətlə gedir. Belə ki, türk xalqlarının yaşadıqları bütün ərazilərdə türk məktəbləri var. Türkiyə televiziyaları fəaliyyət göstərir. Türkiyə iş adamlarının da fəaliyyət sferası kifayət qədər genişdir. Türkiyə türklərinin sayı dünyada 100 milyondan artıqdır. Həmçinin dünyada yaşayan 50 milyon azərbaycanlı, 30-40 milyon uyğur da bu dili yaxşı anlayır.
   
   - Nə üçün ortaq dil yaradılmamalıdır?
   
   - Təbii ki, nəzəri baxımdan türk dillərinin hamısını ümumiləşdirən bir dilin olması daha yaxşıdır. Hazırda belə bir dil yoxdur. Özbəkistan Elmlər Akademiyasının əməkdaşları artıq neçə illərdir bununla bağlı bir layihə üzərində işləyirlər. Layihəyə görə hətta ən az əhali ilə təmsil olunan türk dillərindən həm leksik, həm də qrammatik materiallar götürülərək ortaq süni türkcə yaradılıb. Leksik lüğət də hazırladılar. Ancaq təcrübə göstərir ki, süni yaradılmış dili təbliğ etmək, yaşatmaq mümkün deyil.
   
   - Ortaq dilin Türkiyə türkcəsi seçilməsi yerli xalqların dillərini sıxışdırmayacaq?
   
   - Burada assimilyasiyadan söhbət gedə bilməz. Çünki tarix göstərir ki, dillər heç vaxt bir-biri ilə birləşmir. Yaranmış dillər, ləhcələr getdikcə daha da müstəqilləşirlər. Özümüz neçə 100 illərdir Azərbaycan ədəbi dilində yazıb-oxuyuruq. Amma Azərbaycanın bölgələrindəki şivələr, dialektlər aradan qalxmayıb. Dillərin özünün inkişaf qanunauyğunluqları var. Burada söhbət ancaq ortaq ünsiyyət dilindən gedir. Yəni Azərbaycandan Türkiyəyə göndərilən rəsmi məktub ya ingilis, ya da türk dilində, Orta Asiya dövlətlərinə göndərilənlər isə rus dilində yazılır. Bunun əvəzində isə məktublar Türkiyə türkcəsində göndərilə bilər. Bu xalqların qarşılıqlı əlaqəsində Türkiyə türkcəsi müəyyən rol oynamalıdır. Bu proses artıq başlayıb. Biz Orta Asiyadan olan elm adamları ilə elmi konfranslarda və s. tədbirlərdə adətən Türkiyə türkcəsində danışırıq. Təbii ki, yerli dillərə Türkiyə türkcəsinin müəyyən təsiri olacaq. Ancaq bu təsir heç də dağıdıcı mahiyyət daşımayacaq. Əksinə, Türkiyə türkcəsi ortaq dil kimi istifadə edildikcə özü zənginləşəcək. Bu gün Türkiyənin özündə də bəzi sözlərin digər türk xalqlarının dillərindəki ifadələrə uyğunlaşdırılması məsələsi qaldırılır. Məsələn, "anaxtar" sözünün "açar"la əvəz edilməsi istənilir.
   
   - Siz özünüz də həmişə vurğulayırsınız ki, Azərbaycan bütün türk dünyasının mərkəzidir. Özümüz də oğuz dil qrupuna aidik. Onda niyə ortaq dil kimi Azərbaycan dili götürülməsin?
   
   - Sadəcə, Türkiyə türkcəsinin arxasında duran imkanlar genişdir. Azərbaycan ikinci gəlir. Lakin Azərbaycan dilinin bu cür inkişafı olmasaydı, Türkiyə türkcəsinin ortaqlığından söhbət gedə bilməzdi. Yəni bu məsələdə ikinci ən böyük təsir amili Azərbaycan dilidir. Biz vətənpərvərlik edib ortaq dilin Azərbaycan dili olmasını istəyə bilərik. Belə iddialar da var. Ancaq bununla yanaşı, gerçəklik də mövcuddur. O reallığı biz başa düşüb qəbul etməsək, özbəklər, qırğızlar, qazaxlar heç anlamayacaqlar. Lakin dil xadimlərinin bu təşəbbüsləri Türkiyə türklərində özündənrazılıq yaratmamalıdır. Əgər sabah türkiyəli elm, mədəniyyət, siyasət adamları bizim "güzəştə getməyimiz"dən yararlanıb hər hansı "böyük qardaş" iddiasına düşsələr, onda nəinki ortaq ünsiyyət vasitəsi yaranacaq, heç bu xalqların əlaqələri də normal səviyyədə qurulmayacaq. Qarşı tərəfdən hansı güzəştlər ola bilər? İstəyirik Türkiyə türkcəsinin ortaq ünsiyyət vasitəsi olması üçün mütləq onların əlifbasına "ə" hərfi salınsın. Əgər bu qəbul olunmasa, qardaşlar arasında lazımi ünsiyyət alınmaya bilər. Alınsa da, bu, çox çətin baş verəcək.
   
   

Bakı şəhər Baş Polis İdarəsində (BŞBPİ) cari ilin 6 ayının yekunlarına həsr olunan müşavirə keçirildi. BŞBPİ-dən "Həftə içi"nə verilən məlumata görə, idarənin rəisi Rafiq Abbasov ölkənin inkişafında, ictimai asayişin pozulmasında, cinayətkarlığa qarşı mübarizənin səmərəli təşkilində, əhalinin təhlükəsizliyinin təmin olunmasında DİN və onun ayrı-ayrı strukturlarının rolundan danışdı. Adıçəkilən idarənin rəis müavini Elxan Həsənov hesabat dövründə cinayətkarlığa qarşı mübarizə, ictimai qaydanın və təhlükəsizliyin təmini, əməliyyat-xidmət fəaliyyətinin digər sahələrində həyata keçirilən tədbirlər və qarşıda duran vəzifələr barədə məlumat verdi. Belə ki, ötən ilin müvafiq dövrü ilə müqayisədə bu ilin 6 ayı ərzində Bakıda qəsdən adamöldürməyə cəhdlər 43-dən 36-ya (16,5 faiz), quldurluqlar 74-dən 63-ə (14,9 faiz), adam oğurluqları 8-dən 6-ya (25 faiz), hədə-qorxu ilə tələb etmə 14-dən 7-yə (50 faiz), dələduzluqlar 462-dən 437-yə (5,4 faiz) düşüb. Tamamlanmış cinayət işləri üzrə bütövlükdə cinayətlərin 79,2 faizi, o cümlədən ağır növlərinin 77,5, qəsdən adam öldürmələrin 78, quldurluqların 83,5, soyğunçuluqların 68,5, şəxsi əmlak oğurluqlarının 42,4, dələduzluqların 91 faizi açılıb, 34 soyğunçuluq və quldurluq cinayəti törətmiş 49 nəfərdən ibarət 13 qrup, eləcə də 31 mənzil oğurluğu edən 21 nəfərdən ibarət qrup ifşa edilib. Əllərdə qanunsuz saxlanılan 117 odlu silah, o cümlədən 9 avtomat, 33 tapança, 75 tüfəng və xeyli sayda hərbi sursat götürülüb. Bu ilin 6 ayı ərzində 137 kiloqram (ötən ilin müvafiq dövründə 110 kiloqram olub) çəkidə narkotik vasitə dövriyyədən çıxarılıb. 2008-ci ilin 6 ayı ilə müqayisədə aşkar olunan cinayətlərin sayı 26 fakt, satışla bağlı isə 52 fakt artıb. Rəis müavini onu da dedi ki, keçirilən profilaktik tədbirlər nəticəsində paytaxtda yol hərəkəti təhlükəsizliyinin təmini sahəsində də müsbət irəliləyişlər əldə olunub. O, yol-nəqliyyat hadisələrinin azaldığını buna misal çəkdi. Hesabat dövründə paytaxtda ictimai asayişin mühafizəsi də ciddi nəzarətdə saxlanılıb, şəhər miqyaslı 122 tədbir zamanı ictimai hüquq qaydaları təmin edilib, ayrı-ayrı şəxslər tərəfindən qanunsuz aksiyaların keçirilməsinə yönəlmiş 6 cəhdin qarşısı alınıb, yüksəksəviyyəli xarici qonaqlar Bakıya səfərə gələrkən ictimai təhlükəsizlik tədbirləri ilə bağlı 35 xüsusi plan hazırlanaraq həyata keçirilib.
   
   

Gürcüstan tərəfi Belarus və Azərbaycanın öz vətəndaşlarını ölkəyə daxil olarkən gürcü qanunlarına riayət və hörmət etməyə çağırmasını alqışlayır. "Belarus XİN öz vətəndaşlarını Gürcüstanda - işğal olunmuş, yaxud digər ərazilərin olmasından asılı olmayaraq - olanda gürcü qanunlarına riayət etməyə və sərhədi leqal formada keçməyə çağırıb. Əks halda onlar sanksiyalardan qaça bilməyəcəklər" - "Trend"in məlumatına görə, dünən brifinqdə Gürcüstan XİN rəhbərinin müavini David Calaqoniya deyib. "Bu, Belarusun cəsarətli və ədalətli qərarı idi", - deyə Calaqoniya qeyd edib ki, analoyi müraciəti Azərbaycan da öz vətəndaşlarına edib. "Bu ölkə (Azərbaycan) - bizim tərəfdaşımız və mehriban qonşumuzdur, ondan başqa münasibət gözləyə də bilməzdik. Bu, dostcasına, düzgün və beynəlxalq hüquqa əsaslanan qərardır" - nazir müavini deyib. Calaqoniya bu iki ölkənin atdığı addımı digər ölkələrin də təkrarlayacağına ümid etdiyini bildirib.

AMERİKA Azərbaycanlıları Şəbəkəsi (USAN) Dağlıq Qarabağ münaqişəsi ilə bağlı prezident Barak Obamaya məktub göndərib. Adıçəkilən qurumdan "Həftə içi"nə verilən məlumata görə, Amerika Azərbaycanlıları Şəbəkəsinin icraçı direktoru Adil Bağırov bildirib ki, məktubun göndərilməsinin əsas məqsədi ABŞ-dakı radikal erməni qüvvələrinin Dağlıq Qarabağ danışıqları ilə bağlı spekulyasiyalara son qoyulmasıdır. Eyni zamanda, B.Obama, vitse-prezident Cozef Bayden və dövlət katibi Hillari Klintondan xahiş olunub ki, Azərbaycana səfər edərək Dağlıq Qarabağ münaqişəsinin yaratdığı faciəvi reallıqla yerindəcə tanış olsunlar.
   
   

Tovuzda yerləşən yanacaqdoldurma məntəqəsinə silahlı basqın edilməsi ilə bağlı informasiya agentlikləri xəbərlər yayıb. Məlumata görə, hadisə dünən gecə rayonun M.Musayev küçəsində yerləşən "Qara-petrol" yanacaqdoldurma məntəqəsinda baş verib. Belə ki, rayon sakini Səməd Abbasəli oğlu Səfiyev adıçəkilən yanacaqdoldurma məntəqəsinə gələrək orada operator işləyən - 1982-ci il təvəllüdlü Seymur Səmirxan oğlu Aslanovla mübahisə edib. Daha sonra isə özü ilə gətirdiyi ov tüfəngi ilə S.Aslanova atəş açıb. Xoşbəxtlikdən güllə S.Aslanova dəyməyib. Dərhal hadisə yerinə Tovuz rayon Polis İdarəsinin əməkdaşları gələrək S.Səfiyevi həbs ediblər. İlkin araşdırma zamanı hadisənin namus üstündə baş verdiyi müəyyənləşib. Hadisə ilə bağlı Daxili İşlər Nazirliyinin (DİN) mətbuat xidmətinin rəhbəri Ehsan Zahidovla əlaqə saxladıq. O, "Həftə içi"nə xəbəri təsdiqləsə də, hadisənin namus üstündə deyil, qorxutmaq məqsədilə baş verdiyini söylədi: "Hadisə iyulun 26-dan 27-nə keçən gecə saat 03:00 radələrində baş verib. Səməd Səfiyev qohumu Seymur Aslanovu qorxutmaq məqsədilə özü ilə gətirdiyi ov tüfəngindən yerə atəş açıb. Atəş səsini eşidən Tovuz rayon Polis İdarəsinin əməkdaşları dərhal hadisə yerinə gəliblər. İdarənin əməkdaşları S.Səfiyevi saxlayaraq onun atəş açdığı of tüfəngini müsadirə ediblər. Hazırda faktla bağlı araşdırma aparılır".
   
   

İran Ermənistana Armavir şəhərində tikilən atom stansiyası üçün nüvə yanacağı verməyə hazırdır. "Tehran Times" qəzetinin rəsmi saytının məlumatına görə, bunu bazar günü Qərbi Azərbaycan vilayətinin qubernatoru Rahim Qorbani deyib. "Nüvənin zənginləşdirilməsi üzrə texnologiyanın təkmilləşməsini nəzərə alan İran İslam Respublikası qonşu ölkələrə nüvə yanacağı verməyə hazırdır" - Qorbani Urmiya şəhərində Armavir qubernatoru ilə görüşündə deyib. "Trend"in məlumatına görə, o həmçinin qeyd edib ki, İranın Qərbi Azərbaycan vilayətində çox sayda erməninin yaşaması faktı iki ölkə arasında əlaqələrin inkişafına fayda verə bilər.
   
   

Avropa Gənc Yaşıllar Federasiyası nümayəndələrinin bu gündən Azərbaycana səfəri başlayır. "Avropanın gənc "yaşılları" Bakıda beşgünlük səfər çərçivəsində Azərbaycan Yaşıllar Partiyasının fəaliyyəti ilə tanış olacaqlar" - "Trend"ə Yaşıllar Partiyasının sədri Mais Güləliyev məlumat verib. Onun sözlərinə görə, partiyanın gənclər təşkilatı Avropa Gənc Yaşıllar Federasiyasına üzvlük üçün namizədliyini irəli sürüb. "Azərbaycan, Gürcüstan və Avropanın gənc "yaşılları" birgə tədbirlər və yay düşərgələri təşkil edirlər" - Güləliyev deyib.
   
   

Avstriyanın federal kansleri Verner Fayman hesab edir ki, "Nabukko" layihəsinin həyata keçirilməsinin birinci mərhələsi çərçivəsində bu boru kəməri üçün potensial qaz tədarükçüsü dörd ölkə - Azərbaycan, İraq, Misir və Türkmənistan olacaq. "Nabukko" hər zaman çoxresurslu layihə kimi planlaşdırılıb. Bu o deməkdir ki, qaz kəməri təkcə bir mənbədən asılı olmayacaq", - deyə elektron poçtla "Trend"ə müsahibəsində Fayman bildirib. Onun sözlərinə əsasən, İranın gələcəkdə "vacib qaz resursları ilə" karbohidrogenlərin potensial tədarükçülərinin ilk qrupuna qoşulması bir sıra amillərdən asılı olacaq. Faymen söhbətin hansı amillərdən getdiyini dəqiqləşdirməyib. Avstriyanın federal kanslerinin sözlərinə əsasən, Ankarada iyulun 13-də "Nabukko" üzrə Türkiyə, Bolqarıstan, Rumıniya, Macarıstan və Avstriya arasında hökumətlərarası müqavilənin imzalanması layihəyə cəlb olunan ölkələr və şirkətlər üçün həm siyasi dəstək, həm də hüquqi təhlükəsizlik planında vacib addımdır.
   
   
   
   
   
   

Azərbaycanın böyük sürətlə inkişaf edən mobil operatorlarından biri olan "Azerfon" və "Vodafone" şirkəti abunəçilərə yüksəksəviyyəli rabitə xidmətlərinin təqdim olunması məqsədilə və gələcək texnoloyi işləmələr üzrə birgə əməkdaşlıq üçün nəzərdə tutulan qeyri-səhmdar tərəfdaşlığı haqqında bəyan etdilər.
   
   
   
   Tərəfdaş bazarları haqqında müqaviləyə əsasən, "Azerfon" "Vodafone" şirkətinin təqdim etdiyi bir sıra məhsul, xidmət və qurğulara, habelə təchizatlar silsiləsinin idarə edilməsi, müştərilərin cəlb olunması və təkmilləşdirilmiş şəbəkələrarası əlaqənin təşkil olunması sahəsində "Vodafone" şirkətinin geniş təcrübəsindən eksklüziv istifadə hüququ əldə etdi. "Vodafone" şirkətinin məhsulları "Azerfon"un hazırkı və gələcək abunəçilərinə təqdim olunacaq.
   
   Hazırda ölkədə üçüncü nəsil şəbəkəsini (3G) quraşdıran "Azerfon" şirkəti "Vodafone" şirkətinin yüksəksürətli mobil şəbəkələrin və genişzolaqlı mobil məhsullarının quraşdırılması sahəsindəki təcrübəsindən, həmçinin dünyanın aparıcı təchizatçılarının avadanlıqlarından istifadə edəcək.
   
   "Azerfon" şirkəti ilə əməkdaşlıq "Vodafone" şirkətinə öz müştərilərinə "qlobal" (dünya tərəfdaşları) şəbəkəsinin imkanlarından bəhrələnmək üçün bir sıra xidmətləri, həmçinin Azərbaycan ərazisində genişləndirilmiş əhatə dairəsini təqdim etməyə imkan verəcək. Hər iki şirkət regiondakı "Vodafone Global Enterprise" proqramının müştəriləri üçün əlavə dəstəyinin təqdim edilməsi məqsədilə əməkdaşlıq edəcək.
   
   Azərbaycanda "Vodafone" şirkətinin məhsulları və xidmətləri hər iki şirkətin birgə ticarət nişanları ilə satılacaq. Mərhələlərlə həyata keçirilən prosesin bir hissəsi kimi "Vodafone" şirkəti "Azerfon"un istifadəçilərini fəaliyyət göstərdiyi 67 ölkədə təkmilləşdirilmiş səs və rouminq xidmətləri ilə təmin edəcək.