FİDE şahmatçıların növbəti reytinq cədvəlini tərtib edib. İyul ayı üçün tərtib olunan cədvəlin ilk iyirmiliyində 3 azərbaycanlı qrossmeysterin də adına rast gəlmək mümkündür.
   
   Livesport.az saytının yaydığı məlumata görə, bunlar arasında ən yüksək göstəriciyə Teymur Rəcəbov sahibdir. Aktivində 2756 balı olan Teymur macarıstanlı Peter Leko ilə 7-8-ci pillələri bölüşdürür.
   İlk onluğun bir addımlığında dayanmış Vüqar Həşimovun əmsalı 2739-a bərabərdir.
   Vaxtilə dünyada 4-cü əmsala malik olmağı bacaran Şəhriyar Məmmədyarov isə artıq 19-pilləyə yuvarlanıb.
   Maraqlıdır ki, ilk iyirmilikdə Azərbaycandan çox yalnız Rusiya təmsil olunub və bu amil sevindirməyə bilməz. Lakin etiraf etməliyik ki, Teymur sabit oyunu, Vüqar isə yüksəlişdə olmaqla bizləri nə qədər sevindirirsə, Şəhriyar bir o qədər üzür. Başqa sözlə indidən əminliklə söyləmək olar ki, Şəhriyar şahmata daha ciddi yanaşmasa, növbəti dəfə reytinq cədvəli açıqlananda onun adına ilk iyirmilikdə rast gəlməyəcəyik.
   Nəzərə almaq lazımdır ki, dünyanın bir çox ölkəsi ilk iyirmilikdə heç olmasa bir şahmatçıyla təmsil olunmaq üçün dəridən-qabıqdan çıxır. Yəni bu gün biz bu cür uğura imza atmışıqsa, "şadlığımıza şitlik" etməməliyik. Bu sözlər federasiya rəhbərliyinə ünvanlanır. Axı bu cür istedadların yetişməsi üçün onillər tələb olunur. Şəhriyarın əməlli-başlı parlamamış sönməsinə nəyə görə yol verirsiniz, cənablar???
   Daha bir məqam gənc nəslin yetişməsi ilə bağlıdır. Həqiqətənmi Azərbaycan Şahmat Federasiyası (AŞF) gələcək barədə nikbin düşünə bilər? Axı şahmatın kütləviliyinə nail olmaqla yanaşı, istedadlı gənclər üçün lazımi şərait yaradılmalıdır. Onları şəxsi vəsaitləri deyil, federasiyanın hesabına müxtəlif beynəlxalq yarışlara göndərmək lazımdır. Tapşırıq, tanışlıq, qohumbazlıq və "kimin kisəsi genişdi, buyursun" prinsiplərindən əl çəkilməsə, 8-10 ildən sonra nəinki iyirmilikdə, heç yüzlükdə də azərbaycanlı soyada rast gəlməyəcəyik. Rast gəlsək də, qarşısında Azərbaycan bayrağı olmayacaq...
   İndi də ən çox ümid bəslənilən Teymur Rəcəbov və Vüqar Həşimov barədə. Reytinqə və nüfuzuna görə ilk olaraq Teymurun perspektivi haqda danışmaq istəyirik.
   Rəcəbovun oyun üslubunda romantik şahmat əsrindən əsər-əlamət tapmaq mümkün deyil. Praqmatik oyun üslubuna üstünlük verən 22 yaşlı Azərbaycan təmsilçisi, məhz bu səbəbdən də nadir hallarda məhsuldarlıq sərgiləyir. Doğrudur, bunun nəticəsində Rəcəbovun il ərzundə məğlub olduğu partiyaların sayını barmaqla saymaq mümkündür. Ancaq məsələnin digər tərəfi də var. Teymurun riskə getməməsi onun heç vaxt dünya şahmat Tacına yiyələnə bilməməsi ilə nəticələnə bilər. Şahmatımızın lideri uzun illərdir ki, dünyanın ən elitar şahmatçıları sırasındadır. Ancaq unutmaq olmaz ki, şahmat günü-gündən gəncləşir və Teymurdan 3 yaş kiçik olan norveçli Maqnus Karlssen dünya sıralamasında artıq 3-cü pillədədir.
   İndi də son bir ildə dünyaya səs salmağı bacaran Vüqar Həşimov barəsində. Bu 23 yaşlı gənc barədə saatlarla danışmaq olar. Ancaq son bir il ərzində neçə-neçə dünya şöhrətli ulduza qan uddurmasını və bunun nəticəsində fantastik sıçrayışa nail olmasını xatırlatmaq kifayət edərdi. Özü də Həşimovun oyun üslubu göz oxşayır. O, sanki dünya şahmatına yeni nəfəs gətirib. Qurban verməkdən çəkinməyən, kombinasiyalı oyun üslubuna üstünlük verən, rəqibin ad-sanından qətiyyən çəkinməyən Vüqar şahmat Olimpini fəth etmək iqtidarındadır. Lakin bunun üçün bir neçə şərt var. Həşimov inkişaf sürətini azaltmamalıdır. O, "ulduz xəstəliyi"nə tutulmamalıdır. Riskli şahmatı təhlükəli həddə qədər çatdırmamalıdır. Bax onda Vüqar Həşimovun sıralamadakı nömrəsinin ya birinci, ya da sonuncu rəqəmi silinər. Başqa sözlə Həşimov 11-ci yox, birinci olar.

ÖtƏn mövsümü böyük çətinliklərlə yola verən Tovuzun "Turan" komandasının hələ də maliyyə problemləri məngənəsindən yaxa qurtara bilmədiyi bir vaxtda komanda prezidentsiz qalıb. Elçin Süleymanovun istefasından sonra kimin boş qalmış kresloya sahib çıxacağına bu gün aydınlıq gələcəyi gözlənilir. Ancaq vəsait olmadıqdan sonra kluba kimin prezident təyin olunacağının heç bir əhəmiyyəti yoxdur.
   

ŞüvƏlana köç(ürdül)ən və bununla da adını "Olimpik-Şüvəlan"a çevirən komanda dünəndən etibarən növbəti mövsümün hazırlıqlarına start verib. Livesport.az saytının yaydığı məlumata görə, Əsgər Abdullayevin druyinası hazırlığın ilk mərhələsini Qubada keçirəcək. İki həftə ərzində bu məkanda olmağı planlaşdıran "təyyarəçilər" iki yoxlama görüşündə də qüvvələrini sınayacaqlar.
   
   

Paytaxtın "Bakı" klubunun Çempionlar liqasının ikinci təsnifat mərhələsindəki rəqibi Litvanın "Ekranas" komandası iki yoxlama görüşündə qüvvəsini sınayacaq. Livesport.az saytının yaydığı məlumata görə, Litva çempionu şənbə günü Latviyanın "Yurmala" komandası ilə üz-üzə gələcək. Ardınca isə Valdas Urbonasın yetirmələri Kiprə yollanacaqlar. Üçgünlük təlim-məşq toplanışının son günündə "Ekranas" Kipr çempionu "Omoniya" ilə üz-üzə gələcək.
   
   

Ağdamın "Qarabağ" klubu Türkiyə toplanışını davam etdirir. İlk olaraq Avropa liqasının ikinci seçmə mərhələsi barədə düşünən Qurban Qurbanovun druyinası Qızılcahamam toplanışı çərçivəsində ilk oyununu bu gün keçirəcək. Livesport.az saytının yaydığı məlumata görə, ölkə kubokunun sahibinin rəqibi İranın "Sepahan" kollektivi olacaq.
   
   

NövbƏti mövsümə hazırlıqlarını davam etdirən paytaxtın "Bakı" komandası Fransanın ikinci divizion komandası "Şatoru"nun oyunçusunu transfer edib. Livesport.az saytına klubdan daxil olan məlumatda bildirilir ki, bu serbiyalı Stevan Batesdir.
   Qeyd edək ki, 28 yaşlı müdafiəçi Vətənində "Yelezniçar", "Yeleznik" və "Rad" kollektivləri ilə yanaşı, Bates Rusiya "Alaniya"sında da top qovub.
   

FİFA futbol üzrə milli komandaların reytinq cədvəlini tərtib edib. AFFA-nın futbolumuzun inkişaf istiqamətini düzgün yönləndirməsi, millinin baş məşqçisi Berti Foqtsun titanik səyləri, Avropa çempionu İspaniyanın Azərbaycana gələrək 6:0 hesabı ilə qalib gəlməsi sayəsində yığma komandamız 1 pillə irəliləyib! Bu böyük bayramda əməyi keçən hər bir kəsə dərin təşəkkür düşür. Artıq Azərbaycan reytinq cədvəlində 139-cu pillədə qərarlaşıb. Bizi lider Braziliyadan cəmi 138 pillə ayırır. Əgər hər ay 1 pillə irəliləyişə nail olsaq, cəmi 11,5 ildən sonra birinci pillədə məhz Azərbaycan yer alacaq. Nə olsun ki 1 ay ərzində əmsalda 26 xal itirilib?! Nə olsun ki Zimbabve, Haiti, İordaniya, Çad, Burundi, Vyetnam, İndoneziya, Botsvana, Nikaraqua, Honkonq, Efiopiya kimi ölkələr Azərbaycanı qabaqlayır?! Heç ermənilərin bizi artıq 17 pillə qabaqlaması da heç nəyi dəyişmir. Əsas odur ki AFFA çimərlik futbolu, futzal, əlillər arasında futbolda uğurlar əldə edir.
   
   Təəssüf, min dəfə təəssüf! Bizə isə ümid etmək qalır. Ümid edək ki, heç olmasa bu gün Rövnəq Abdullayev federasiyaya topladığı və etibar etdiyi ətrafında ciddi dəyişikliklər edəcək. Əks halda coğrafiya dərslərini pis oxumuş futbolsevərlər Azərbaycanı arxada qoyan hələ neçə-neçə ölkənin adlarını eşidəcəklər.