Yola saldığımız 2008-ci il Avropa Şurası Parlament Assambleyasında (AŞ PA) Azərbaycan üçün uğurlu olub. AŞ PA-dakı Azərbaycan nümayəndə heyətinin rəhbəri, Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidov deyib ki, ölkəmizin mövqeləri təşkilatda daha da möhkəmlənib, Ermənistanın durumu isə xeyli zəifləyib:
   
   "2008-ci ildə Azərbaycan rəhbərliyi ölkənin təbliği və maraqlarının qorunması, beynəlxalq aləmdə nüfuzunun daha da möhkəmlənməsi ilə bağlı gərgin və səmərəli fəaliyyət göstərib. Ötən il Azərbaycanın ərazi bütövlüyü məsələsi Birləşmiş Millətlər Təşkilatında ən yüksək səviyyədə müdafiə olunub. BMT Baş Məclisində Dağlıq Qarabağla bağlı qəbul olunmuş sənəd AŞ PA sənədlərində də öz əksini tapıb. Ötən il qəbul edilən sənəd bir daha imkan yaradıb ki, Avropa Şurasında birdəfəlik və heç bir şübhə altına qoyulmadan Azərbaycanın ərazi bütövlüyü müdafiə edilsin. 2008-ci il avqust ayında Rusiya ilə Gürcüstan arsında baş verən münaqişə beynəlxalq münasibətlərdə gərginlik yaradıb. Avropa Şurasının rəhbərliyi Azərbaycan rəhbərliyinə müraciət edərək sülhə nail olunmasında öz səylərini əsirgəməməyi xahiş edib. Azərbaycan rəhbərliyinin yeritdiyi tarazlı və düzgün siyasət nəticəsində ölkəmizin maraqları yüksək səviyyədə müdafiə olundu. İnkişaf üçün yeni əsaslar yarandı". S.Seyidov deyib ki, ötən ilin oktyabrında Azərbaycanda keçirilən prezident seçkiləri də bütün beynəlxalq təşkilatlar və ölkələr tərəfindən demokratik standartlara uyğun, xalqın iradəsini əks etdirən seçkilər kimi qeyd edilib. Prezident seçkiləri Avropa Şurasında yalnız bir dəfə daimi komitədə müzakirə olundu, Parlament Assambleyasında ümumiyyətlə müzakirələrdən imtina edilmişdi: "Ona görə ki, şəffaf və demokratik şəraitdə keçirilmiş, xalqın iradəsini əks etdirən seçkilərin AŞ PA-da müzakirəsinə ehtiyac qalmamışdı. Azərbaycandan fərqli olaraq Ermənistan artıq bu qurumda təzyiqlə üzləşir. Ermənistanın məsələsinə Parlament Assambleyasında baxılır və bu ilin yanvar sessiyasında yenə də ciddi müzakirə olunacaq. Məsələ o qədər ciddidir ki, Ermənistanın bu təşkilatda səsvermə hüququ belə alına bilər". S.Seyidov onu da vurğulayıb ki, başqa ölkələrin bu və ya digər problemləri, insan haqlarının qorunması kimi məsələlər Avropa Şurasında müzakirə olunarkən Azərbaycan nümunə göstərilir: "Bu baxımdan yola saldığımız 2008-ci il Strasburqda Azərbaycan üçün çox uğurlu və məhsuldar olub".